Ilinniarnertuunngorniarfiit aaqqissuussiffigineqarnissaat aallartippoq

Palle Christiansen ilinniarnertuunngorniarfiit aaqqissuuteqqinnissaannik pilersaarummik saqqummiussivoq

Siullermik Atuarfitsialak ingerlanneqalerpoq taava Meeqqerivitsialak aallartisarneqarpoq maannalu Ilinniarnertuunngorniarfitsialak anguniarneqalissaaq.

Ilinniartitaanermik Naalakkersuisoq Palle Christiansen, Demokraatit sisamanngornermi ualikkut Inatsisartut ataatsimiittarfianni ilinniarnertuunngorniarnermik ilinniarfiup aaqqissuuteqqinnissaanik pilersaarummik saqqummiussivoq.

- Ilinniarnertuunngorniarfiit aaqqissuuteqqinnissaannut Naalakkersuisut anguniagaasa pingaarnersaraat, nunatsinni ilinniarnertuunngorniarnerup ineriartorteqqinnissaat, Palle Christiansen nassuiaavoq, taamaaliornikkut inuusuttut amerlanerpaat ilinniarnertuunngornermik ilinniarfinni naammassisalernissaat anguniarneqassamat taamatuma saniatigut piginnaasutsikkut qaffassaasoqarluni aammalu nunat tamalaat akornanni ilinniarfittut akuerisaasutut atuunnera attatiinnarneqarluni. Aaqqissuusseqqinnikkut angorusunneqarpoq ilinniarnertuunngorniarfinni ilinniartut piginnaasaasa anguniagassaasalu inerisarneqarnissaat, sumiluunniit najugaqaraluarunik, suiaasusaat aammalu ukiui kiisalu inuttut, kulturikkut oqaatsitsigullu tunuliaqutaat apeqqutaatinnagit pitsaanerpaamik angusaqarsinnaaqqullugit.

Taamatut!

Ukiuni makkunani inuusuttut ilinniarnertunngorniarfimmi atualernissaminnut qinnuteqartartut amerliartorput. Tamanna pitsaasorujussuuvoq kisiannili tamatuma nassataanik init atuartitsiviusut, kollegiani inissat, atuartitsissutit aammalu ilinniartitsisut amerlanerit pisariaqartinneqarput aammali soraarummeernernut atatillugu aningaasartuutit amerlinissaat pisariaqartinneqarput. Ukiuni makkunani Naalakkersuisut aningaasanut inatsisissatut siunnersuutaanni aningaasarpassuit kollegialiornernut illuartinneqartarput, inissaqannginneq pissutigalugu inuusutut nunatsinniittut ilinniagaqanngitsoornissaat pinaveersaarniarneqarmat.

Ilinniarnertuunngorniarfinni atualertartut tamarmik ilinniakkamik naammassinninneq ajorput. Ilinniarnertuunngorniarfinni taamaatiinnartartut aamma ajornartorsiutaapput, 2010-mi ilinniarnertuunngorniarfinni atuartut 24 procentiisa atuarnertik unitsiinnarmassuk. Kisitsisinngorlugu atuartut 250 missaat ukiumut atuarunnaartarput, atuarnerminnik unitsitsiinnartartut atuartumut inuiaqatigiinnullu akisoorujussuupput.

- Anornartorsiut taanna ilinniarnertuunngorniarfiit unammisassaasa qaangerniagassaasali ilagiinnarpaat, tamanna inatsisissatut siunnersuummi ilanngunniarneqassaaq aningaasatigut nammatassai ilanngullugit, Palle Christiansen oqarpoq.

Powered by Labrador CMS