Cairnimik suleqateqarnissamut isumaqatigiissut atsiorneqarpoq

Isumaqatigiissut atsioqatigiissutigineqartoq siorna Cairn Energy-mik suleqatigiinnissamik isumaqatigiissutigineqartup ingerlaqqinneraa.

Taamaalilluni suleqatigiinnissamik isumaqatigiissummi nutaami ilanngunneqarpoq, ukiup siulianut naleqqiullugu nunaqavissunik sulisoqarneq pilersuisunillu atuineq annertusineqassasoq.

Tamanna ilaatigut pivoq Cairn-ip suliap ingerlanerani siusissukkut suliffeqarfinnik nunatsinneersunik pilersuisunngorsinnaasunik toqqaannartumik ataatsimeeqateqartarneratigut taamatullu pilersuisuusussat nunanit allaneersut nunatsinni tusagassiuutini nunaqavissunik sulisussarsiorlutik allagarsiisimallutik. Ilisimasanik ingerlatitseqqinnissamut piumasaqaatit (assersuutigalugu sulilluni sungiusarfissanik pilersitsineq, sungiusaaneq aamma ilinniartitseqqinneq) taamatuttaaq ukiumut kingullermut sanilliullugu annertusineqarput, ilanngullugit qillerivinni qillerinermut assistentinik 6-inik atorfinitsitsisoqarluni. Taamatuttaaq Ilinniartitaanermut aningaasaateqarfik pilersinneqarpoq, tassani sulisussanik nunaqavissunik piginnaanngorsaanissamut 2,6 mio. kr. missaat immikkoortinneqarlutik. Tamanna ukioq kingullermi aningaasaliissutaasunut sanilliullugu marloriaatinngortitsineruvoq. Peqatigisaanik Timersornermut Kulturimullu aningaasaateqarfik pilersinneqarpoq 375.000 kr. missaannik aningaasartaqarluni, aningaasat timersornermut kulturimullu tunngasunut tapersiinernut atorneqartussaallutik.

2011-mut isumaqatigiissummi kisitsisit pingaarnerit, 2010-mut isumaqatigiissummut sanilliullugit imaapput, (taakku paranteseqarput):

Cairn nunatsinni nioqqutissanik kiffartuussinermillu ima nalilinnik pisissaaq 244 mio. kr. (153 mio. kr.)

Suliakkerneqartut nunatsinni ima kiffartuussinernik nioqqutissanillu imaattunik pisissapput 67 mio. kr. (19 mio. kr.)

Akileraarutit akilerneqartut (A aamma AMA)
(Suliakkerneqartut nunanit allaneersut) Minn. 53 mio. kr. (53 mio. kr.)

Ilisimatuussutsikkut misissuinerit (2008-miilli) 23,5 mio. kr. (15,5 mio. kr.)

Nunaoilimit 430 mio. kr. (276 mio. kr.)

Kalaallit sulisinneqartut 55 (50)

Ilinniartitaanermut aningaasaateqarfik, 6 mio. kr. (1,3 mio. kr.)

Timersornermut kultureqarnermullu aningaasaateqartik 0,4 mio. kr.

Aningaasaateqarfinnut taakkununnga marlunnut siulersuisut sapaatip akunnerani 38-imi siullermeerlutik ataatsimiissapput. Tamatuma kingorna aningaasaateqarfinnit taakkunannga marlunnit tapersiivigineqarnissamut qanoq iliorluni qinnuteqartoqarsinnaanersoq piaartumik allagarsiissutigineqassaaq.

2011-mut isumaqatigiissummi suliniutissanut aalajangersimasunut assersuutit allat:

Cairn-ip qilleriviini atorfeqartussat qillerinermut assistentit kalaallit tallimat

• • Cairn-ip qilleriviini atorfeqartussaq radiotelegrafisti kalaaleq ataaseq

  • Aalisarnermut alapernaarsuisussanik 9-nik atorfinitsitsineq, taakkunannga 4-it ilinniarnerminnik naammasserlaajullutik

  • Air Greenland-ip qulimiguulinni timmisartortartuinik 4-nik sungiusaaneq

  • Periarfissaatillugusuliffeqarfinnit nunaqavissunit pisineq

  • Suliffeqarfinnik pilersuisuusussanik isumasioqatigiisitsinermik ingerlatsineq

Suleqatigiinnissamut isumaqatigiissut Nanoq.gl-imi saqqummersinneqarpoq uanilu ukunanilu atuarneqarsinnaalluni:

Kalaallisoortaa uaniippoq:

http://www.nanoq.gl/Emner/Landsstyre/Departementer/Råstofdirektoratet/VurderingafSamfundsmaessigBaeredygtighed.aspx,
tuluttoortaa uaniilluni:
http://dk.nanoq.gl/Emner/Landsstyre/Departementer/Råstofdirektoratet/VurderingafSamfundsmaessigBaeredygtighed.aspx.

Aatsitassanut ikummatissanullu inatsimmi § 76-78 naapertorlugit Cairn-ip misissuilluni qillerinerinut atatillugu Inuiaqatigiinni piujuartussamik iluaqutaasumik sunniutaasussanik nalilersuineq (VSB) ingerlanneqartussaavoq, tamannalu tunngavigalugu suleqatigiinnissamik isumaqatigiissusiortoqartussaavoq (IBA-mik isumaqatigiissut). Suleqatigiinnissamik isumaqatigiissummi Kalaallit Nunaata aningaasatigut pissarsiassai, sulisunik nunaqavissunik atuinissaq aammalu nunaqavissut suliffeqarfiinik peqataatitsinissamut (kiffartuussissutinik pisineq aamma teknikkikkut suliaqartussanik pilersuisuusussanillu najukkameersunik atuineq) anguniakkat aalajangersarneqarput.