Anthon Frederiksen apeqqarissaarfigineqarpoq
Siumup nunami namminermi naalakkersuisoqarfik piaartumik atorunnaarsinniarpaa
Ukiaanerani ataatsimiinnermi sapaatip akunneranut Inatsisartut ataatsimiittarfiani apeqqarissaarneq pissaaq aqqanerniit ullup qeqqanut, tassani naalakkersuisunut ilaasortat tulleriiaarlutik apeqqarissaarfigineqartarlutik. Inatsisartunut ilaasortat sunaluunniit pillugu apeqquteqarsinnaapput, piffissamili apeqqeqqarissaarfimmi aalajangiisoqarneq ajorpoq.
Naalakkersuisunut ilaasortani siulliulluni nunamut namminermut, pinngortitamut avatangiisinullu naalakkersuisoq Anthon Frederiksen Kattusseqatigiit Partiianneersoq apeqqarissaarfigineqassaaq, naatsorsuutigissavaalu pingasunngornermi ullaap tungaani akunnermi ataatsimi persarineqarnissani.
Siumup marlunngormalli naalakkersuisut siulittaasuata Kuupik Kleistip ammaanersiorluni oqalugiaataata oqaluuserinerani Anthon Frederiksen sakkortuumik isornartorsiorpaa.
Siumup siulittaasuata Aleqa Hammondip toqqaannartumik Kuupik Kleist aperaa naalakkersuisut nunamut namminermut naalakkersuisoqarfik sumut atorniarneraat, "kommuninummi atatillugu susoqarsimanngilaq".
– Ima oqaannarsinnaavugut naalakkersuisoqarfik pisariaqanngitsoq pisarissersuutaannaasorlu. Namminersorlutik oqartussat kommunillu kattuffiata Kanukokap suleqatigiinnissaannut aporfiuvoq, taamaattumik piaartumik Siumumiit naalakkersuisoqarfik atorunnaarsinniarparput!
Aleqa Hammondip eqqaavaa naalakkersuisut juunip 2-ani 2009-mi nunamut namminermut naalakkersuisoqarfik pilersikkamikku neriorsuutigigaat kommuninik suleqateqarnerup pitsaanerullunilu eqaannerunissaa.
– Maannakkut Kuupik Kleist arlaleriarluni ammaanersiorluni oqalugiaammini oqarpoq kommuninik suleqateqarneq pitsaanerulertariaqartoq, taamaattumik aperaagut kommuninut attaveqarneq sutigut ajalusoorsimanersoq, Aleqa Hammond oqarpoq.
Tamannalu Anthon Frederiksenip apeqqarissaarfigineqarnerani apeqqutigeriaannaavaa.