Ataatsimiititaliat ikinnerusut nukittunerusulli

Pingasunngorpat sisamanngorpallu inatsisartut suleriaasissaq nutaaq sukkasuumik pingasoriarlugu oqaluuserereerlugu akuerissavaat, tassani ataatsimiititaliat ikinnerusut nukittunerilli pilersinneqassapput, sisamanngorpallu ualikkut pingajussaaneereerlugit kinguninngua ataatsimiititalianiittussat nutaat toqqarneqassapput. Naalakkersuisooqatigiit Inuit Ataqatigiit, Demokraatit aamma Kattusseqatigiit Partiiat suleqatigiinnissamik isumaqatigiissusiussapput, illuatungiuttullu Siumut aamma Atassut allamik suleqatigiiffiliussallutik.

Suleriaatsip allanngortinneratigut ataatsimiititaliat pilersinneqartussat aqqanillit sisamanngortinneqassapput, taamaalilluni ataatsimiititaliaq katillutik qulinngussallutik ataavartut ilanngullugit. Aammali ataatsimiititaliat nutaat arfineq marlunnik inuttaqassapput maannakkut tallimaasunik inuttaqarlutik.

– Siulittaasoqarfiup kissaatigisarsimavaa ilaasortat sulinerisa nukittorsarneqarnissaat, ikinnerusunillu ataatsimiititaliaqarnikkut taamaalilluni ataqatigiissaaruminarnerulerlutik sukumiinerusumillu samminnittoqarsinnaalerluni, Inatsisartut siulittaasuat Josef Motzfeldt Inuit Ataqatigiinneersoq oqarpoq.

Siulittaasoqarfiup naatsorsuutigaa ataatsimiititaliani nutaani suliassaqarfiit imminnut attuumasut nukittorsarneqarnissaat.

Inatsiseqarnermut, nunami namminermi eqqissisimatitsinermullu ataatsimiititaliat ataasinngortinneqassapput Inatsineqarnermut ataatsimiititalianngorlutik.

Kukkunersiuinermut kiisalu akileraartarnermut akitsuuteqarnermullu ataatsimiititaliat akileraartarnermut kukkunersiuinermullu ataatsimiititalianngussapput.

Attaveqarnermut ineqarnermut avatangiisinullu ataatsimiititaliat sanaartornermut avatangiisinullu ataatsimiititalianngussapput.

Ilaqutariinnermut peqqissutsimullu ataatsimiititaliat Ilaqutariinnermut peqqissutsimullu ataatsimiititaliaalissapput.

Inuutissarnirnermut, Aalisarnermut, piniarnermut nunanerilermut, aatsitassanut nunatsinnilu aluminiumik aatsitsiviliornissamut ataatsimiitaliaagallartoq kattullutik Pisuussutinut ataatsimiititalianngussapput.

Ataatsimiititaliat pilersinneqartussat arfinillit tassaalissapput Siulittaasoqarfik, aningaasaqarnermut ataatsimiititaliaq, nunanut allanut sillimaniarnermullu ataatsimiititaliaq, akileraartarnermut kukkunersiuinermullu ataatsimiititaliaq, Inatsiseqarnermut ataatsimiititaliaq kiisalu qinersinermut ataatsimiitialiaq.

Ataatsimiititaliat ataavartut sisamat tassaalissapput Sanaartornermut avatangiisinulu ataatsimiititaliaq, Ilaqutariinnermut peqqissutsimullu ataatsimiititaliaq, Pisuussutinut ataatsimiititaliaq kiisalu Kultureqarnermut, ilinniartitaanermut, ilisimatusarnermut ilageeqarnermullu ataatsimiititaliaq.