Meeqqat atuarfiat aningaasanut inatsimmi avissaartuutsitsivoq
Naalakkersuisut inuiatatigiinni ukioqqortussutsimut tunngasoq saqqummiuppaat, Demokraatilli naaggaarput
– Meeqqat atuarfiat pitsaanerpaaq kissaatigaarput imaluunniit akisunerpaaq? aningaasaqarnermut naalakkersuisup Maliina Abelsenip Inuit Ataqatigiinneersup meeqqat atuarfiani sipaarnissamut siunnersuutinik akerliusut aperai.
Pingasunngornermilu ualikkut apeqqut taanna Maliina Abelsenip apeqqutigeqqissavaa 2012-mut aningaasanut inatsisissatut Naalakkersuisut siunnersuutaat "Allannguinerit oqimaaqatigiissut" saqqummiukkuniuk.
Nunatsinni inuiaqatigiit ukioqqortussusaannut tunngasuuvoq: Meeqqat ikinnerulissapput utoqqaallu amerlanerulerlutik, ukiunilu kingullerpaani meeqqat atuarfiani atuartut 14 procentimik ikileriarsimapput. Meeqqat atuarfiata ingerlanneqarnera kommunit akisussaaffigaat, taamaattumik Maliina Abelsenip ukiunut 2012-miit 2020-mut kommuninut ataatsimoortumik tapiissutit 1 milliard koruuninik ikiliniarpai atuartut ikiliartornerat ilutigalugu. Ukiuni tulliuttuni sisamaannarni Maliina Abelsenip meeqqat atuarfiani 145,8 million koruunit sipaarniarpai.
Tamanna ajornakusoorsinnaavoq. Marlunngornermi ammaanersiornermi oqalugiaatip oqaluuserineqarnerani Demokraatineersup Niels Thomsenip meeqqat atuarfiani sipaarnissaq akerlerilluinnarpaa.
– Meeqqat atuarfiat pitsaasoq pilersinniarlugu akerlianik aningaasaliinerusariaqarpugut, Niels Thomsen oqarpoq, nunatsinnilu siunissami ineriartornissamut ajunaarnersuartut nalilerlugu inuusuttut ukioqatigiit affai sinnerlugit piginnaalersitsisussamik ilinniagaqannginnerat.
– Maliina Abelsen inuiaqatigiinni ukioqqortussuseq tunngavilersuutigalugu sipaarnissamik siunnersuuteqarpoq, meeqqallu atuarfiani sipaarnissaq naleqqutinngilaq, Niels Thomsen oqarpoq.
Maliina Abelsenip taama oqartoqarnera utertippaa: - Inuiaqatigiinni ukioqqortussuseq isiginiassanngikkutsigu aamma utoqqaat amerlanernik aningaasaliiffigineqassanngillat, naak amerlanerulersimagaluarlutik.
Namminerlu tamanna akissutissaqartippaa: – Ukiuni aggersuni meeqqat atuartut ikilippata meeqqat atuarfiat ullumikkurtut akeqartariaqanngilaq, utoqqaat amerliartortut akissaqartissagutsigik.