Isumaginninnermik suliallit ilinniagaqaqqipput
Ilaqutariinnut centerini qimarnguinnilu kiisalu ullukkut unnuakkullu paaqqinnittarfinni sulisut 21-it ilinniagaqaqqinnertik naammassivaat, tassuunakkut ulluinnarni sulinertik pitsanngorsassallugu piginnaasaqarnertillu annertusassallugu
Holdit aappassaat ukiuni marlunni ilinniagaqaqqinneq modulinut aggorsimasoq sulianullu sammitinneqartoq "Mianernartoq Akiuussinnaassuserlu" naammassivaat.
- Ilinniagaqaqqinnermi peqataasut tassaapput inuit tamaviaarlutik sulisut, suliaat nunatsinni ulluinnarni ersinngitsuusaarpasissut, Conni Gregersen, cand.psych.aut., psykoterapi-mi immikkut ilisimasalik ilitsersuisorlu tusagassiorfinnut nalunaarutikkut oqarpoq.
Ilinniagaqarnermi siunertaavoq sulisut ulluinnarni sulinerminni piginnaasaat annertusassallugit pitsanngorsassallugillu.
Ilinniagaqarnermi sammisat assigiinngitsut sammineqarput, tamarmik isumaginninnermik sulisut ulluinnarni suliaannut attuumassutillit, assersuutigalugu "Isiginninnermiit iliuuseqarnermut misissuinerit akissuteqarnerillu aqqutigalugit", "Artukkerneqarneq illersorneqarnerlu - erninerup siorna, nalaani kingornalu", "Oqaatsit iliuuseqarnerlu - qaangiineq allannguinerlu. - Socialpædagogiskimik katsorsaaneq katsorsaariaasillu", "Pitsaaliuilluni ilaqutariinnik katsorsaaneq - suliniuteqarneq arlalinnit isigalugu", "Suliffimmi samminninneq qanilaartuunerlu", aamma "Ilisimasallit politikerillu innuttaasut sunnertiasut sumiginnaraangatigit".
Isumaginninnermik sulisut 21-it ilinniaqqinnermi uppernarsaataat tunniunneqarpoq ataasinngornermi septembarip 19-ianni Ilulissani Hotel Arcticimi.