Paamiuni aallaasersorneq
Ippassaq unnulersukkut nal. 18.25 Paamiuni politiassitentimut eqqartoqarpoq. Politiit angut eqqartoq ujaaraat
Politimmut eqqarnerit eqquingitsulli angummit 43-nik ukiulimmit Hilmer Ibsen Christensenimit Paamiuni najugaqartumit ingerlanneqarput, Nuummi politeeqarfimmi vicepolitimesteriugallartoq Niels Nyvang allappoq.
Politiassistenti eqqaamiunit aggersarneqarpoq HIlmer Christensenip arnaataatalu akornanni eqqissiviilliortoqarmat. Blok V-p eqqaani najugaqarput.
Politiimut eqqareerluni Hilmer Christensen qoorortuulisaluni illoqarfiup kangianut qaqqanut ingerlavoq, nalunaaqutarlu 21.45 suli tassaniilluni, Niels Nyvang nalunaarpoq.
Nuummi politiit ippassaq unnukkut nal. 20.00 Paamiunut ikiuiartorlutik tikipput, unnuallu ingerlaqnerani angut 43-nik ukiulik nassaariniaraluassallugu.
Politiit Paamiuni innuttaasut kajumissaarpaat illoqarfiup avataanukaqqunagit pissutsit aaqqinnissaata tungaanut.
Hilmer Christensen navianartupilussuartut nalilerneqarpoq. Taamaattumik innuttaasut kajumissaarneqarput qaninngooqqunagit takussagaluarunikkullu politiinut nalunaaqqullugit.
Hilmer Christensen aappaluttumik tujuuloqarpoq naatsunillu qarleqarluni. Qanoq ittunik kamippaqarnersoq ilisimaneqanngilaq, politiit nalunaarput.