Neriuffimmut 127.000 koruunit
Kalaallit Nunaanni ilaqutariit kræftimik eqqugaasut Tele Postip ikiorpai
Kalaallit Nunaanni kræftimik akiuiniaqagtigiiffik, Neriuffiit Kattuffiat, ippassaq Tele-Postimit checkimik 127.000 koruuninik aningaasartalimmik tunineqarpoq. Taamatut tusagassiorfinnut nalunaarutikkut paasissutissiivoq Tele-Post.
Aningaasat pissarsiarineqarput Lis Stenderip 2009-mi frimærkiiaanit ilassutitalimmit tuniniaanermit. Eqqumiitsuliortoq malillugu frimærkimi inneq asanninnerlu takussutissaapput nappaatip atuunnerani kræftertup ilaqutaasalu atugaannut.
-Nuannaarutigaarput inuiaqatigiinni akisussaassuseqarnermik takutitsigatta katersuinianikkut, ingerlatsivimmut Kalaallit Nunaanni ilaqutariinnut kræfimik eqqugaasunut annertuumik suliniuteqartumut ikiuutinik taama amerlatigisunik kingunilimmik, pisortaanerugallartoq Steen Montgomery-Andersen oqarpoq.
Neriuffiit Kattuffiata inuit kræftimik nappaatillit ikorniarnissaannut piumassutsiminnik sulisut aningaasatigullu tunissutit isumalluutigisarpai.
-Sulinitta ingerlateqqinnissaanut nukissanik nutaanik tunineqartarpugut malugigaangatsigu katersuiniarnerit inuiaqatigiit tapersersoraat, sooru una Tele-Postip ingerlassimasaa, Neriuffiup siulittaasua Johanne Olsen nuannaarluni oqarpoq.
Ukiut tamaasa Tele-Post frimærkimik ilassutitalimmik saqqummersitsisarpoq ajunngitsuliorluni suliniummut tunniunneqartussanik, 2009-milu Neriuffiit Kattuffiat tapersersorneqartussatut toqqarneqarsimavoq.