Kalaaliaqqat pillugit saqqummersitsineq
Koldingimi Dansk Sygeplejehistorisk Museum Julemærkesanatoriap ukiunik 100-nngortorsiorneranut atatillugu kalaaliaqqat pillugit saqqummersitsivoq
Ukiut ingerlanerini kalaalerpassuit Koldingimi Julemærkesanatoriami tb-mut katsorsartittarsimapput. Tamanna peqquteqarpoq nunatsinni 1950-ikkunni inuttussutsimut naleqqiullugu nunarsuarmi tb-eertut ajoraluartumik amerlanerpaasimammata. 1954-mi Nuummi Dr. Ingridip nappasimmaviata sananeqarnera naammassimanngilaq.
Napparsimmavimmi inissat amigarmata kalaaliararpassuit tb-eertut Danmarkimut katsorsartikkiartortinneqartarsimapput. Ukiuni 1952-miit 1959-imut katillugit kalaaliaqqat 100-t Koldingimi Julemærkesanatoriami katsorsartissimapput.
Dansk Sygeplejehistorisk Museum marloqiusanik naalungissanut immikkoortortaqarpoq 1917-mi 1933-milu sananeqartunik. Koldingip kangerluani Julemærkesanatorie 1911-mi ammarneqarpoq Danmarkimi juullimut nipitittakkatigut isertitanit aningaasalerneqarluni napparneqartoq.
Kalaaliaqqat
Dansk Sygeplejeskehistorisk Museumimi Julemærkesanatoria ukiunik 100-nngortorsiorneqarpoq kalaaliaqqat pillugit immikkut saqqummersitsilluni. Saqqummersitami meeqqat allatut ittunik takornartanillu avatangiiseqartut ulluinnarni inuunerat allaaserineqarpoq.
Qallunaat meerartaat qaqutikkuinnaq angajoqqaaminnit pulaarneqartarput, kalaaliaqqalli angajoqqaaminnit pulaarneqarsinnaanngillat. Meeqqat katsorsartinnerannut siuariartornerannullu paasissutissat Koldingimi nakorsat peqqissaasullu allagai atorlugit taamaallaat ingerlanneqartarpoq.
Takornartat akornanniitillutik kalaaliaqqqat nunagisaminnik eqqaasinneqarput ullut ilaanni septembarimi 1954-mi niisarnat 63-it Lillebæltimut takkummata. Aalisartut eqqaaniittut 14-it pisaqapallannissartik atorluarlugu iluatsitsillutik pisaqarput.
Vejle Fjord aagasaartoq
Naalikkat nissiillu nammineq sanaajusut atorlugit aalisartut arfernik toqoraapput. Aamma inuit takkussuuttut ilaat niisarnanik toqoraanermi ilaapput. Aalisarnermut nakkutilliisut aalisartut arferit pisamik tigummiinnarnissaat akueraat.
Neqili mikiapallappoq arferillu amerlanersaat iginneqarlutik. Ikittuinnaat inunnit nerineqarput. Vejlep talittarfiani aalisakkanik tuniniaavimmi arferup neqaa tuniniarneqarpoq, nakorsaanerullu Arthur Mårtenssonip kalaallit nappasimasut pissaqarnissaat qulakkeerpaa. Meeqqat mattattornertik iluarisimassajunnarsivaat.
Koldingimi Dansk Sygeplejehistorisk Museumimi kalaaliaqqat Julemærkesanatoriamiissimasut pillugit saqqummersitsineq kaffillernertalimmik septembarip 20-ani nalunaaqutaq 15 ammassaaq.