Atlasimi nutaami Kalaallit Nunaat kukkusumik takutinneqarpoq

Times Atlas of the Worldimi nutaami sikup aakkiartornera ingasaanneqarpoq, tassani nunap 15 procentia takutinneqarluni qorsooqqissutut sermeqanngitsutullu

Silap pissusiata allanngoriartornera Kalaallit Nunaanni pissutsinik nutaanik pilersitsivoq. Sikulli 15 procentia peerussimanngilaq, issittumik ilisimatooq isornartorsiuivoq. BBC Times-imit nunap assinga satellitsimit assilisaq. Ass.: BBC

Atlasini ataqqineqarnerpaami Times Atlas of The World-imi aaqqissuisut kanngusuusaarput, issittumik ilisimatuut isornartorsiorujussuareeraallu oqarmata Kalaallit Nunaanni sermip 15 procentia peerussimasoq.

Atlasi nutarsagaq sapaatip akunnerani kingullermi saqqummersinneqarpoq, tassanilu takuneqarsinnaavoq Kalaallit Nunaata nunataata 15 procentia qorsuusoq sermerqanngitsorlu.

Tamanna ajorluinnarpoq, ilisimatuut Scvott Polar Research Institute-meersut oqarput. Sermeq millisimagaluarpoq, taamali annertutiginngitsumik.

- Ilisimasavut malillugit taamatut oqarneq ilisimatuussutsikkut atuagassiani naqitatigut taperserneqanngilaq, ilisimatuut The Times-imut allakkaminni allapput.

Ilisimatuut tassanngaanneersut amerlasuut nunarsuup kissatsikkiartornerata issittumi kinguneqaatai uppernarsarniarlugillu misilillugillu annertuumik peqataasimapput, BBC allappoq.

- Kalaallit Nunaata satellitsikkut assingani kingullerpaami ersarippoq suli sermeqaqisoq ataavartumillu sermimik qallersimasoqaqisoq, Times-ip atlas-iani nutaami takutinneqarlutik sermeqanngitsut nunallu nutaat, ilisimatuu allapput.

Naqiterisitsisarfik Harper Collins, The Times sinnelrugu atlas-imik naqiterisoq, oqarpoq Kalaallit Nunaata assinganut paasissutissat USA-p pisortatigoortumik issittumut centerianit (NSIDC) pisimallugit atlas-imilu nutaami 150 pundinik (1300 kr.-nik) akilimmi paasissutissat aalajangiusimallugit.

The Times oqarpoq atlas-ertik nunarsuarmi "eqqornerpaajusoq".

/ritzau/

Powered by Labrador CMS