Atassut aamma Siumut tapersersoqatigeeqqilerput

Atassutip siulittaasuata Gerhardt Petersen-ip patiimilu Inatsisartuni ilaasrotaatitaasa marluk Knud Kristiansen-ip aamma Siverth K. Heilmann-ip sapaatiummat ullup qeqqanut Hotel Hans Egede-mi Atassutip ataatsimeersuarnera qimappaat Namminersorlutik Oqartussat Nuummi allaffeqarfianni Siumukkut siuttui ataatsimeeqatigiartorlugit.

– Sisamanngormat ulloq taanna qinersisoqartoq, partiinit naalakkersuisuutitalinnit tupaallaatigisatsinnik allagarsivugut, tassani Inuit Ataqatigiit, Demokraatit kiisalu Kattusseqatigiit Partiiata Atassummik suleqateqarnertik taamaatillutu nalunaarput, ataatsimiinneq sioqqullugu Atassutip aaqqissuussaanikkut siulittaasup tullersortaa Knud Kristiansen sermitsiaq.ag-mut oqarpoq.

– Suleqatigiikkunnaarnermut pissutaasoq sunaanersoq nassuiaatigineqanngilaq, tamatumali kingorna Siumut atassuteqarfigaarput, siorna novembarip 15-ianni partiitta marluk suleqatigiikkunnaartut suleqatigiileqqinnissaat pillugu. Ataatsimiititani ataavartuni Atassutip ilaasortaatitaqarnissaa pingaartipparput, Inatsisartuni ilaasortat 31-t akornanni marluinnarnik ilaasortaatitaqarluta ilaasortaatitaqarnissatsinnik piumasaqaateqarsinnaannginnatta partiinik allanik suleqateqarniartarpugut, naalakkersuisuutitallillu suleqatigerusunngimmatigut Siumukkut suleqatiseraagut.

Suleqatigiikkunnaarneq pissanganartoq

2009-mi jjunip aapaanni naalakkersuisuutitallit taarserneqarmata illuatungiliuttunngortut Siumut aamma Atassut suleqatigiinnissaminnik siumaqatigiissuteqarput, taamaaliornikkut Atassutip ataatsimiititani ikittunnguani pingaarutilinnili ilaasortaatitaqalerpoq. Siorna novembarip 15-ianni aningaasanut inatsit akerlilerlugu Siumut taasisoq Atassut akuersimmat, Siumup ingerlaannartumik Atassummik suleqateqarunnaarluni nalunaarpoq. Ullup ingerlanerani taamaammat Atassut naalakkersuisooqatigiinnik suleqateqalerpoq, taamaaliornikkullu Atassut Kukkunersiuinermut ataatsimiititami, Aalisarnermut, Piniarnermut kiisalu Nunalerinermut ataatsimiititami, Inuussutissarsiornermut ataatsimiititami kiisalu Aatsitassaqarnermut ataatsimiititami ilaasortaatitaqalerluni.

Novembarip 15-ianni naalakkersuisooqatigiit aatsitassarsiornermi uran-itaqanngilluinnartumik aatsaat aatsitassarsiortitsiniarnerat, Kuannersuarni aatsitassarsiorniarneq eqqarsaatiginerullugu piumasaqaataat Atassutip akueralugu atsiorpaa, naak aatsitassarsiornermi uran-ip saniatigut piiarneqarsinnaanera partiip tunngaviusumik tapersersoraluaraa.

– Naalakkersuisooqatigiit sooq Atassut suleqatigiunnaarpaat?

– Naalakkersuisooqatigiit Inatsisartuni ilaasortaasa Atassutip suleqatigiunnaarnissaa piumasarisimavaat, Atassummik suleqateqarneq iluatissaqartutut isigineqanngimmat, taakkuami namminneq inissaraluatik Atassummiit aamma ilaasortaaffigineqarmata, Naalakkersuisut siulittaasuat Kuupik Kleist sermitsiaq.ag-mut oqarpoq.

Atassut inatsisartuni marlunnik ilaasortaatitaqaraluartoq ataatsimiititani ataavartuni pissaaneq 3-2-mik inissisimavoq, taamaamallu taakkua partiit pingasut, Inuit Ataqatigiit, Demokraatit aamma Kattusseqatigiit Partiiat namminneq ilaasortaaffigisinnaasatik Atassummit ilaasortaaffigineqartippaat.

Naalakkersuisooqatigiit inatsisartuni ilaasortaatitaasa, minnerunngitsumit Aalisarnermut, Piniarnermut kiisalu Nunalerinermut ataatsimiititami Atassutip ilaasortaatitaanik isumaqatigineqartannginnermik kinguneranik suleqatigiinnerliulersimapput.

Ataatsimiititat aaqqissuuneqartarnerat ulluni tulliuttuni allanngortiterneqalerpoq, ataatsimiititat ikinnerit pissaaneqarnerusulli pilersinnissaat siunertaralugu. Taamaammat ataatsimiititat Ukiaanerani ataatsimiinnerit tallimanngormat aallartimmatali suli atuuttussanngortinneqanngillat. Sisamanngorpat ualikkut tamanna aatsaat pissaaq, taamaammat Siumut Atassullu suleqatigiileqqinnissartik taamaalillutillu ataatsimiitani ilaasortaatitamik qanoq inissitsiternissaat suli isumaqatigiinniutigaat.