Gerhardt Atassutip siulittaasuatut ingerlaqqippoq

Nuummi isornartorsiuisartut ataatsimeersuarnermi inissinneqarput

Gerhardt Petersen, uani qinersisoqarmat unnukkuani, sapaatiummat ataatsimeersuarnermi Atassutip siulittaasuatut qinigaaqqippoq. (Ass.: ). Leiff Josefsen

Atassutip siulittaasuata Gerhardt Petersen-ip sapaatip akunnerata naanerani ataatsimeersuarnermi Nuummi immikkoortortaqarfiup tunuartitsiniaraluarnera itigartippaa, immikkoortortaqarfillu siulersuisuni sunniuteqarunnaartillugu.

Nuummi Atassutip immikkoortortaqarfiani siulittaasoq ulloq qinersinersiviusoq oqarpoq, namminneq folketingimut qinigassanngortitamik sallersaat Steen Lynge siulittaasussatut sassartillugu. Qinersinermi inernerit nikalluallannartut takoreerlugit Steen Lynge-p tamanna eqqarsaatigilluareerlugu unammillerniarunnaaginnarmat, ulluinnarni aqutsisunut Nuummiit ilaasortaatitaq Ove Thomassen siulittaasumut unammilleraluarpoq.

– Siulittaasumut suli qinersisoqanngitsoq Ove Thomassen, politiitut atorfilik 35-nik ukiulik sermitsiaq.ag-mut oqarpoq, qinersinermi ajorsarnerup kingorna Atassut makiteqqinniarlugu arlaannik allannguisoqartariaqalersoq.

- Atassutip liberalitut nutaanerusunut akuersaartutut aallaavini ersarissut uterfigeqqittariaqalerai, inuussutissarsiutit nukittuujunissaannik, minnerunngistumik suliffeqarfinnik pilersitsiniartunut atugassarititaasut eqqarsaatigalugit, kiisalu kingoqqiviit oqaatsillu apeqqutaatinnagit inuit tamarmik inuiaqatigiinni inissaqartinnissaat eqqarsaatigalugit. Ullumikkummi takusinnaavarput inuusuttut liberalitut eqqarsartartut Demokraatinik tapersersuisut, taamaammat uagut anguniakkagut erseqqissartariaqarpagut, taanna oqarpoq.

Allattuinikkut taasinermi Gerhardt Petersen, Qaqortoq, 14-init taaneqarpoq, Ove Thomassen, Nuuk, arfineq marlunnit taaneqartoq, taasivik ataaseq allaffigineqarsimanngilaq.

Inatsisartuni Qaasuitsup Kommunianilu kommunalbestyrelsemi ilaasortaq, Knud Kristiansen, Upernavik, unammillerteqarani politikkikkut siulittaasumut tullersortinngorpoq. Folketingimut qinigassanngortittoq Arnannguaq Blytmann, Aasiaat, aaqqissuussaanikkut siulittaasumut tullersortinngorpoq 15-init taaneqarluni Ove Thomassen, Nuuk, arfineq marlunnit taaneqartoq.

Ulluinnarni aqutsisunut ilaasortanngorput Mette-Sofie Lerch, Sisimiut, aamma Margrethe Kruse Jensen, Narsaq. Siulersuisuni ilaasortanngortut pingasut tassaapput Samuel Mørch, Upernavik, Paninnguaq Kruse, Aasiaat, aamma Karl Markussen, Uummannaq.

Ataatsimeersuarnerup siorna Nuummi immikkoortortamiit siulersuisunut ukua ilaasortaagaluarput, aaqqissuussaanermut siulittaasup tullersortaatut Hans Lyberth kiisalu ulluinnarni aqutsisuni ilaasortaq Ove Thomassen; ullumi illoqarfiit pingaarnersaanniit Margrethe Kruse Jensen, Narsamiit Nuummut nuunneq kisimi ilaasortaavoq.

– Siulersuisuni nutaanik ilaasortaqalerpoq sineriammilu sumiiffinni assigiinngitsuneersuullutik, politikkikkut siulittaasup tullersortaa Knud Kristiansen sermitsiaq.ag-mut oqarpoq.

Powered by Labrador CMS