Atlantikup avannaa periusiorpoq
Nunatta folketingimut ilaasortaatitaasa marluk savalimmiormiullu socialdemokratip Sjudur Skaalep siunissami suleqatigiinnissamik periarfisat aqagu oqaloqatigiissutigissavaat
Den Nordatlantiske Gruppe atajunnaassava, taamaassappallu nutaamik allamik suleqatigiiffissaqarpa, folketingimut ilaasortat atlantikup avannaaneersut Folketingimi suli tusaaniarneqarfigisinnaasaannik?
Tassa folketingimut qinigaarlaat, IA-meersup Sara Olsvigip Siumumeersullu Doris Jakobsenip savalimmiormiullu socialdemokratip Sjudur Skaalep, aqagu ullaakkut ataatsimiikkunik qitiusumik oqaluuserisassaat.
Ilimanartoqarpasippoq Den Nordatlantiske Gruppe - ullumikkut sananeqaataatut ilisimasatsitut - atajunnaassasoq. Tamatumunnga pissutaavoq Siumut socialdemokratit folketingimi gruppiannut ilanngutereermat, Sjudur Skaalelu tassunga aamma ilanngukkusulluni, politikkikkut piumasat arlallit naammassineqassappata.
Imaanngilarli atlantikup avannaamiut suleqatigiinnerat immikkut ittoq tamaanga killeqartoq. Sermitsiaq.AG-p paasisai malillugit suleqatigeeriaatsimik nutaamik qilersorsimannginnerusumillu pilersitsinissaq sulissutigineqarpoq.
- Neriuppunga Den Nordatlantiske Gruppe arlaatigut ingerlaqqissinnaassasoq. Taamaassinnaanngippat suleqatigiiffimmik nutaamik immaqa qilersorsimannginnerusumik nassaarniartoqartariaqarpoq, Den Nordatlantiske Gruppemi siunertamik suli naammassinnittumik - tassalu folketingimut ilaasortat atlantikup avannaaneersut sapinngisamik annertunerpaamik sunniuteqarnissaat, savalimmiormiu Høgni Hoydal, gruppimik pilersitseqataasoq oqarpoq, taannalu tupaallannartumik Folketingimut qinigaaqqinngitsoorpoq.