Kaasarfimmiussat naatsorsuutiginngisat

Meeqqat Upernavimmiut nuannaartut 14-it qanittukkut Odense Kommuniata Hasmarkip eqqaani tammarsimaffiani Opad-imi suliniutip Inuk-p siulittaasua Vittus Kalia tikilluaqquvaat. Vittus Kalia Projekt Inuk-milu ilaasortat allat kaasarfimmiussanik, juullimut siusinaartumik tunissutissanik, nassarlutik takkupput. Taamatut tusagassiorfinnut nalunaarutikkut oqaluttuarpoq Odensemi Kalaallit Illutaanneersoq Annette Bogø Lyberth.

Odense ukiut pingajussaa tulleriisiinnarlugit Upernavimmi Margrethe Skolen-imi atuartunik tikeraarteqarpoq. Meeqqat sapaatit akunnerini pingasuni illoqarfimmiissapput qallunaanilu ilaqutartiinni najugaqarlutik. Meeqqat tamarmik Projekt Inuk-mit, kalaallit meerartaannik ikiuinissamik siunertalimmit, tikilluaqqusissutitut kaasarfimmiussanik 300 kr.-nik tunineqarput, taanna oqaluttuarpoq.

Juullimut tunissutit

Projekt Inuk-p siulittaasua Vittut Kalia juullip inuatut isigineqarusuppoq. 2007-imiilli suliniummi tassani ilaasortat allat peqatigalugit ukiut tamaasa 50.000 koruuninik katersisarsimavoq, Kalaallit Nunaanni isorliunerusuni kalaallinut ilaqutariinnut agguaanneqartartunik. Aningaasat immikkoortinneqarput qulakkeerlugu meeqqanut atorneqartassasut.

Ukioq manna suliniutip Upernavik eqqarsaatigisimavaa, nunap immikkoortuatut suliniutip tukkorneranik iluaquserneqartussatut.

- Taamaattumik misigisaq annertuujuvoq meeqqat maaniinneranni tunissutisiassaannik tunillugit, Vittus Kalia oqarpoq, oqaluttuarporlu meeqqat immikkut kaasarfimmiussarsigamik nuannaaqisut.

Atuarneq ilaqutariinniinnerlu

Meeqqat 14-it septembarip 2-anni Odensemut tikipput. Ullut siulliit Hasmarkimi tammaarsimaffimmi nuannisaqatigiipput. Tamatuma kingorna Odensemi Kalaallit Illuutaanni qallunaanit ilaqutariinnit najugaqarfissaminnit aaneqarput. Meeqqat ilaqutariinni najugaqassapput sapaatit akunnerini marlunni, tamannalu peqatigalugu Odensemi atuarfinni assigiinngittsuni 6. klassimi atuassallutik.

Ilinniartitsisuat Abigael Lennert angajoqqaallu ilaat Rebekka Joensen Upernavimmit angalaqataapput, taamaattumik ilisarisimasaminnik qanittumiittoqartuarlutik, Annette Bogø Lyberth oqaluttuarpoq.

Piareersarluarsimapput

Upernavik Odenselu illoqarfittut ikinngutigiitoqaapput, kommunersuarlu nutaaq Qaasuitsup Kommunia Odensep nutaatut kommunitut ikinngutigilersimavaa.

Meeqqat Odensemut tikeraarnissaannut piareersarniarlugit Annette Winther, ilinniartitsisoq soraarneq, aasakkut atuanngiffeqarnermi Upernaviliartinneqarpoq, tassanilu meeqqat tamaasa atuartippai ilaqutaalu tamaasa naapillugit. Tamatuma saniatigut Odense Kommune piumassutsiminik ataqatigiissaarisoqarpoq Kirsten Wandall, tikeraarnernik piareersaasumik.