Kuupiup ingerlaannaq Helle atassuteqarfigaa

Qallunaat sivisujaamik naalakkersusisunngortitsiniarlutik isumaqatigiinniarsinnaapput

Kuupik Kleist-ip qallunaat naalakkersuissunngotitaat piaarnerpaamik atassuteqarfiginiarpai. (Ass.: Leiff Josefsen).

– Danmarkimi naalakkersuisunngortussat soorunami suleqatiginissaannut qilanaarpugut. Naalakkersuisunngortut piaartumik attaveqarfigissavagut, Inatsisartut ukiaanerani ataatsimiinnerat aallarnerlugu Naalakkersuisut siulittaasuat oqalugiarnermini taamatut oqarpoq.

Kalaallit Nunaanniit Sara Olsvig, Inuit Ataqatigiit aamma Doris Jakobsen, Siumut, Folketingimut ilaasortanngortinneqarput, taakkualu Savalimmiuni Socialdemikratineersoq Sjurdur Skaale peqatigalugu saamerliit Helle Thorning-Schmidt-imik ministeriuninngortitsisut suleqatigilissavaat. Atlantikup avannaaniit ilaasortanngortut pingasut ilanngukkanni, folketingimi ilaasortanit 179-iusunit saamerliit katillugit 92-inik tapersersorteqalerput.

Socialdemokratit siulittaasuata Helle Thorning-Schmidt-ip qaqugu kingusinnerpaamik naalakkersuisunngortitsissalluni oqaatiginngilaa: – Siornatigut sivisujaamik isumaqatigiinniartoqartarpoq, piffissarlu pisariaqartitarput atussavarput, Helle Thorning-Schmidt (S) TV2 News-imut oqarpoq.

Ullumi Danmarkimi nalunaaqutaq naapertorlugu aqqaninngoriilaartoq, ministeriuneq Venstre-meersoq ajorsartoq, pisortatigut tunuarniarnini dronning Margrethe-mut kunngissamullu Frederik-mut nalunaarutigiartorpaa, Helle Thorning-Schmidt-ilu naalakkersuisunngortitsiniartussatut toqqarneqarpoq, folketingimi ilaasortanit 92-init tapersersorteqarluni.

Kuupik Kleist-ip ammaanermini Sara Olsvig aamma Doris Jakobsen qinigaanerannik pilluaqquai: – Qinigaasut pilluaqquakka – neriulluarfigaatsigit, sulilluarnissassinnik suleqatigiilluarnissassinnillu kissaappatsigit – neriulluta nunatsinnut sinniisuulluassasusi. Naalakkersuisuni suleqatiginissassinnut qilanaarpugut.

Kuupik Kleist-ip neriuutigaa, Sara Olsvig-ip aamma Doris Jakobsen-ip Christiansborg-imi Kalaallit Nunaannut sinniisaalluarnissaat.

Powered by Labrador CMS