DR-ip Kalaallit Nunaat mitallerpaa

Qallunaat tusagassiiviata tusagassatigut pilersuinissaminut piumasaqarfigineqarluni isumaqatigiissutilik piaaraluni, atlantikup avannaani folketingimut qinigaasut pillugit paasissutissiinngilaq

DR Update-miit qinersinerup ilanngutassiarineqarnera TV-kkut assilisaq

Qallunaap tusagassiortup namminersortup, Danmarkimi folketingimut qinersinermit DR Update-mut ilanngutassiisartup oqaatigaa, Atlantikup avannaani qinigaasut DR-mit sumiginnarneqartut isumaqarluni.

- Qinersineq sukkut tamatigut aallakaatitassiarineqaraluartoq, Atlantikup avannaaniit ilaasortanngortut, siornatigut naalakkersuisunngortitsiniaanermi pingaaruteqartarnikuusut pillugit tusagassiisoqanngilaq. Qinigassanngortittut nuimanerusut taasiartornerannut allaat ilanngullugit tusagassiaraagut, kisiannili Nuummiit imaluunniit Torshavn-imiit ilanngutassiortoqanngilaq. Soorlu arsaattut unammilernerannit ilanngutassiortut ajugaatsitsisussat ilisaritillugit ilanngutassiarinngitsoorlugit, isiginnaariat pillugit ilanngutassiuinnartut. Folketingimi ilaasortanngortut sisamat taaneqanngilluinnarnerat ingasappallaaqaaq. Kalaallit Nunaat Savalimmiullu Danmarkip avinngarusimasortaaniittunut assersuunneqarsinnaapput. Taakkua ilumoorlutik oqarsinnaapput qineqqusaarnermi ilanngutassiarineqarsimanatik. Kalaallit Nunaanni Savalimmiunilu qanoq qinerseriaaseqarnersut uanga annertunerujussuarmik paasisaqarfigerusukkaluarpakka. Paasisakkalu naapertorlugit Savalimmiuni ilaasortanngortup aappaa kinaassanersoq suli nalornissutigineqarpoq, tusagassiortoq namminersortoq Pia Koppelman tusagassiortut nittartagaanni journalisten.dk-mi taamatut allappoq.

Tusagassiortoq taanna DR-ip nutaarsiassanik aallakaatitsiviani Update-mi pisortap, Per Bjerre-p, ilumoorluinnarnerarpaa.

Taanna isumaqarpoq, Kalaallit Nunaanni qinersineq KNR-ip ilanngutassiivigisariaqaraa DR-ip pinnani. Qallunaat aallakaatitsiviatigut qallunaat qinigasssanngortitaat ilanngutassiarineqassapput.

- DR Update-mi, tusagassiuutinilumi allani, Kalaallit Nunaanni Savalimmiunilu qinersinerit annikitsuaraararsuarmik ilanngutassiarineqarput. Ilumoorlunga oqassaguma, tamanna uanga ajorinngilara. Danmarkimi qinersisartuunerusunuunerusoq aallakaatitassiortarpugut, kalaallit savalimmiormiullu qinersinitik pillugit, taakkua tusagassiuutaasa aallakaatitassiarisassavaat, Per Bjerre Journalisten.dk-mut oqarpoq.

Allaaserineqartoq tamaat uani atuarsinnaavat: DR-kritik: Update overser Grønland og Færøerne

Qallunaat kalaallillu partiivisa qineqqusaarnerisa takusassiarineqarnerisa assigiinngissutaat pillugu, Sermitsiami maanna saqqummertumi atuarsinnaavutit. Assiliisartoq PR.GL-imik piginnittoq, Jørgen Chemnitz, partiit qinigassanngortittullu takusassiarineqarneri naliliiffigeqqullugit aviisip qinnuigisimavaa.

Jørgen Chemnitz-ip partiit qineqqusaarutaat ajornerarpai. Qinigassanngotinneqartut avataarsuaneersutut isikkoqarput, naqitat isikkulersorneri suliarinerlutaangaaramik soorlu 1950-ikkunni naqitat, naliliisoq oqarpoq.

Partii ataaseq iluarnerusunik sanatitsisimavoq. Taassuma partiip qinigassanngortitani kusanartumik inatsisartorpalaartumillu saqqummiuppai, kalaaleq assiliisartoq taamatut naliliivoq.

Aviisi pisiariuk naliliinerlu pillugu atuagassaqarnerullutit:

Powered by Labrador CMS