Nordatlantisk Gruppe unitsinneqariaannaavoqq
Savalimmiormiut folketingimut ilaasortanngortitaata Sjurdur Skaale-p qallunaat Socialdemokrateqatini qanimut suleqatigerusuppai
Ukiut qulit matuma siorna Danmarkimi talerperliuniat naalakkersuisunngorput. Ukiorlu taanna Kuupik Kleist-ip savalimmiormiullu Høgni Hoydal-ip Den Nordatlantiske Gruppe pilersippaat, kingornalu Siumumeersup Lars-Emil Johansen-ip ilaasortanngorfigaa. Naalakkersuisut ukiuni qulini naalakkersuisooreerlutik taarserneqalersullu aamma Gruppe oqaluttuaannangulerpoq.
Savalimmiormiup socialdemokratip, Sjurdur Skaale-p, folketingimut qinersinermi Høgni Hoydal-imiit taguunneqarnerusup Den Nordatlantiske Gruppep ilaasortaaffiginissaa periarfissaasorinngilaa. Siumup Socialdemokratinik suleqateqarnerattut inissikkaanni politikkikkut pitsaaquteqarnerussaaq: Savalimmiunut pitsaaqutaasinnaasut qanimut suleqatigiiffigisinnaallugit, namminerli pingaartitat pineqartillugit allaanerusumik tasisinnaatitaalluni.
- Soorunami naalakkersuisunut toqqaannartumik atassuteqalissaagut. Qineqqusaarnermi tamanna aamma oqaatigiuarsimavarput. Taammaammat Savalimmiuni socialdemokratit ilaasortaatitaata tassanngaannaq Den Nordatlantiske Gruppe-mut ilaasortanngornissaa takorloorsinnaanngilara. Politikkikkut sunniuteqarnissarput siunertaraarput, maannakkullu socialdemokrateqatitta naalakkersuisuutitaqalernerat atorluarniartariaqarparput, Sjurdur Skaale oqarpoq, taamaakkaluartorli ilaasortat atlantikup avannaaneersut pituttunngikkaluarlutik suleqatigiiffeqarsinnaapput. Kisianni tassa Den Nordatlantiske Gruppe-p maannamut ingerlanermisut ingerlaannarnissaa Skaale-p takorloorsinnaannginerarpaa.
Savalimmiormiut ilaasortanngortitaata aappaa, Sambandspartimeersoq, Edmund Joensen, kalaallillu ilaasortanngortitaat, IA-miit Sara Olsvig kiisalu Siumumeersoq Doris Jakobsen, oqaloqatigeriarlugit Sjudur Skaale-p qanoq inissinnissani ullumi ullup ingerlanerani pisortatigut nalunaarutigissamaarpaa.
Den Nordatlantiske Gruppe-p ingerlaannarnissaa taamaalilluni Sara Olsvig-ip kisimi ornigilerpaa. Taava apeqqutaalerpoq, IA – soorlu Siumut taamaaliortoq – naalakkersuisunngortitsisuni sunniuteqarnissaq anguniarlugu, SF-imik qaninnerusumik suleqateqarniassanersut. Maannakkut politikkikkut suleqatigisartakkat naalakkersuisunngortitsisut, sooq aamma ilaasortaaqatigilissanngilagut, Sjurdur Skaale politikkikkut inissinnissani pillugu oqarpoq.