Issittumi siku aatsaat taama annikitsigilerpoq

1972-imi Issittumi sikup uuttortarneqartalernerata kingorna, aatsaat taama annikitsigisoq sikuulersoq, tysklandimiut ilisimatuut misissuinerminnit inernerit arfininngormat saqqummiukkamikkit, taamatut nalunaarput.

- Issittumi siku septembarip 8-nni 4240 miliuuni kvadratkilometeritut annertutigaaq. Bremens Institute of Environmental Physics-imiit tusagassiuutitigut nalunaaruminni allapput, oqaluttuarisaanermi aatsaat taama annikitsigisoq sikusimasoq.

- Siornatigut annikinnerpaaffigisimasaaniit, 2007-imi uuttortarneqarsimasumiit, maannakkut sikusimasoq 0,5 procentimik annikinnerusoq aamma nalunaarutigineqarpoq.

Issittumi sikumiit seqerngup qinngorneri tarrarsuutitut avataarsuanut uterteqqinneqartarput, nunarsuatsinni sumiiffiit issittut taamaalillutik issittuaannartillugit, tamannalu nunarsuatsinni tamarmi silap pissusaanut pingaarutilimmik sunniuteqaataasarpoq.

Aasakkut siku aattarpoq, aasarlu siku ukiut 40-t matuma siorna sikuusup affaannaatut annertussuseqarpoq.

Issittumi sikup annertussusaa, qaammataasat atorlugit 1972-imi uuttortarneqartalerpoq.

- Sikup annikilliartornera, ukiumiit ukiumut silap allanngorarneranik pissuteqarnerarneqarsinnaajunnaarpoq. Silap allanngorarneranik misissuinerit takutippaat, tamanna inuit periusaasa kingunerannik nunarsuarput kissakkiartortoq, Georg Heygster, Bremen-imi misissuisarfimmi pisortaq oqarpoq.

Ukiuni 50-ini kingullerni ilisimatuut misissuisarnerisa takutippaat, Issittumi sila nunarsuatsinni sumiiffinnit allaniit marloriaammik sukkatigisumik kissakkiartortoq.

Qaammataasat atorlugit uuttortaanerit 1972-imili aallartimmata, Issittumi siku ukiut qulikkaarlugit 11 procentimik annikilleriartartoq.

Issittumi siku ukiut kingulliit 40-t ingerlaneranni saaliartuinartoq, ilisimatuut aamma nalunaarutigaat. Sikuli qanoq saaliartortiginersoq ilisimatuut oqaatigisinnaanngilaat, sikup issussusaa annertussusaaniit uuttortaruminaannerummat.

/ritzau/AFP