Emil Joelsen ullumi nassaarineqarpoq
Emil Joelsen-imik ujaasisut ullumi iluatsitsipput. Emil Joelsen, ullut qulit matuma siorna putsumut pulagami tammarsimangaluarpoq
Ullumi Isortup Nassuttuullu akornanni ujarlertut iluatsitsipput. Emil Joelsen nukillaarsimagaluaqaluni ajunngitsoq, kriminalkommissær Johan Davidsen, qeqqani politiineersoq nalunaarpoq.
- Ullumi nal. 12.45 Emil Joelsen, Nassuttuup isortullu akornanni, sineriammiit toqqaannarlugu 17 kilometerit missaanni tiffasitsigisumi, qulimiguulimmik Air Greenland-imiit attartukkamik nassaarineqarpoq. Emil Joelsen, ullut qulit matuma siorna putsumit pakasarneqarluni tammarsimavoq, taamanililu timaaniissimalluni, Johan Davidsen oqaluttuarpoq.
Politiit nassaarimmanni nukillaarsimaqaaq, isikkamigullu qaatitersimagami pisunnerlulluni.
Nassaarineqarami Emil Joelsen Qeqertarsuarmi napparsimmaviliaanneqarpoq misissortikkiartorluni.
Emil Joelsen Qeqertarsuarmeersoq aggustip 30-anni Nassuttuumut aavariarpoq, septembarip 7-anni angerlamut apuutissamaarluni.
Ilaqutai septembarip 8-nni tusagaqanngimmata, annertuumik ujaasisoqalerpoq.
Ujaasisut Emil Joelsenip umiatsiaa tuperfialu ippassaq nassaaraat, tassalu ullumi Emil Joelsen nassaaralugu.