Umiarsualiviit matoorarnissaat aalisartut kingumut aarlerisaarutigaat
Aalisartut atugassarititaasut naammagiunnaarpaat. Taamaammat inuiaqatigiit aalisartut inissisimanerat pillugu paasititsiniaaniarpugut, KNAPK-p siulittaasua Leif Fontaine nalunaarpoq
Inatsisartut ukiaanerani katersuuppata aalisartut akerliussutsimik takutitsissamaarput. Ukiuni kingullerni aalisarnikkut piniarnikkullu atukkat ilungersunarsigaluttuinnarnerat Kalaallit Nunaanni Aalisartut Piniartullu Kattuffiani ilaasortat Immikkoortortaqarfiit naammagisinnaajunnaarlugu ulluni qaninnerni Allattoqarfimmut Ulluinnarnilu Aqutsisunut nalunaartarnerat, tamatumunnga pissutaavoq, KNAPK-p siulittaasua Leif Fontaine tusagassiuutinut nalunaarummini allappoq.
Taamaattumillu Immikkoortortaqarfiit nuna tamakkerlugu inuiaqatigiit paasitinniarlugit immikkut iliuuseqarnissaq ilaasortanut tamanut kaammattuutigaat. Ilaatigut Immikoortortaqarfiit ilaanniit umiarsualivinnik matooraasinnaanissaq eqqarsaatersuutigineqarpoq.
Taasariaqartullu makkuupput:
- Pingaartumik avannaani qaleraleqarfinni pissutsit ilungersunartut naammagineqanngillat
- Imaatigut inuussutissarsiutigalugu aningaasarsiornermi aningaasartuutit qaffak-kaluttuinnarput
- Aalisakkanut akit qaffakkumaneqanngitsut
- Aalisarnermut Inatsisip nutarternera aammalu sinerissap qanittuani aalisarnikkut nu-tarterisoqannginnera naammagineqanngilaq
Kalaallit Nunanni Aalisartut Piniartullu Kattuffiani Ulluinnarni Aqutsisut ataatsimiinnerminni 6.september 2011 aaliangerput Inatsisartut ukiakkut ataatsimiinerisa nalaanni nuna tamakkerlugu akerliussutsimik takutitsinissaq KNAPK-mit piareersarneqassasoq.
Taamaattumik Immikkoortortaqarfiit KNAPK-miit piffissami aggersumi tusarniaavigineqassapput akerliussutsimik takutitsinissami iliuuserisinnaasat eqqarsaatigalugit, Leif Fontaine tusagassiuutinut nalunaarummini allappoq.