MT Højgaard Qinngutsinni kiassaateqarfiliussaaq
Qinngutsinni 12 mio. koruuninik akilimmik kiassaateqarfiliassap suliarinnittussarsiorneqarnerani MT Højgaard suliassanik tamanik suliarinnittussatut toqqarneqarpoq
Piffissaq kingulleq arorlugu toqqaasoqarpoq, oktobaimimi ukiuleriissaaq, toqqavissaalu issilerpallaannginnerani naammassereersimasussaavoq, ingerlatsivik tusagassiuutinut nalunnaaummini allappoq.
Taamaammat immikkoortortaqarfimmi pisortaq Lars Bjørn Knudsen sulisunilu ulappupput, qaarsumi toqqavissaa qaartiternissaanut qilleralutik.
- Kiassaateqarfissaq 300 kvadratmeteriinnaasussaammat qaartiterivallaartussaanngillat. Nillertippallaartinnaguli toqqavissaa naammasserusupparput, Lars Bjørn Knudsen oqarpoq.
Toqqavimmut sukassai savimerngit ikkussorneqassapput, oqorsarneqassalluni iigalersorneqassallunilu. Saavani aamma igalaarujussuaqartussaavoq. Saviminertasssai igalaassaalu Aalbogrgimi talittarfimmiit Nuummukaanneqassapput, taamatut tusagassiuutinut nalunaarummi allassimasoqarpoq.
Kiassaateqarfissa 2012-imi juulip aallaqqaataani naammassineqareersimasussaavoq, Nukissiorfiillu sanaartortitsisuullutik. Kiassaateqarfik Qinngutsinni napparneqassaaq, tamaani maannakkut 1.200 najugaqartoqarpoq sulilu inissiat 1000-it missaat sananeqartussaallutik.