Folketingimi ilaasortaaneq
Nuna tamakkerlugu politikeri sunaana, folketingimi politikeri sunaana, Aamma folketingimi ilaasortaatitat (MF) ilinut kalaallimut qanoq isumaqarpat? Demokraatit folketingimut qinigasssanngortitaat, Aviaaja K. Poulsen oqalliseqataarusulluni aperivoq
- Qineqqusaarnermi arlaleriarluta tusareerparput qineqqusaartut eqqartoraat Inatsisartuni oqaluuserisassaangaluit, Folketingimiunngitsoq - imaluunniit ilumoorpa? Aalajangiisarfiit taakku marluk sunaana assigiinngissutigigaa aamma sumut killeqarpat? - Aviaaja Karlshøj Poulsen oqallisissiamini ilaatigut taamatut allappoq.
- Kalaallit Nunaata folketingimi sinniisuutitaqarnerata siunertaraa nalagaaffeqatigiinni oqartussaaffiit suli tigusimanngisagut pitillugit kalaallit soqutigisaannut illersuisuunissaq. Oqartussaaffiit taakku ilaatigut ukuupput; nunanut allanut illersornissamullu tunngasut, politii eqqartuussiviit kiisalu nunap aningaasai.
- Folketingimut ilaasortaq imaanngilaq uulia pillugu isumaqatigiinniartussaq, oqartussaaffinnik tigusinermut atatillugu sinaakkutissanik isumaqatigiinniartussaq imaluunniit nunaqarfiit siunissaannut aalajangiisartussaq - tamakku nunap nammineq politikeriisa suliassaraat.
- Paarlattuanik kalaallit nunaannut kalaallillu soqutigisaannut tunngasuni ataatsiomiititaliani suleqatigiissitanilu tamani sinniisuusarpoq. Taamaattumik kalaallip Folketingimi ilaasortap suliassaasa pingaarnersaraat akuunikkut Kalaallit nipaannik soqutigisaannillu anngussisarnissaq.
Foplketingimi ilaasortaatitavut Inatsisartut Folketingillu akornanni attaveqaataapput.
- Qineqqusaarnermut atatillugu oqallinnermi nunap iluani nammineq nunanullu allanut tunngasut ataatsikkut oqallisigineranut pissutaagunarpoq, naalagaaffeqatigiinni killeqarfiiup aanngariartornera, Kalaallit Nunaata namminiilivinnissaata qalliartornera peqatigalugu.
- Namminiilivinnissamut aqqummi aamma suliassaavoq Folketingimi Kalaallit Nunaata Danmarkillu suleqatigiinnerisa ineriartortinnissaa. Tassani ineriartornermi Kalaallit Folketingimi ilaasortaatitai salliussapput ajornanngippallu nutaamik eqqarsassapput nunatta ineriartoqqinnissaa pillugu.
Ukiuni makkunanerpiaq Issittumi pissutsit soqutigineqaleruttorfianni, kalaallit nunaannilu namminersorneq pillugu inatsisip misiligarneqaleruttorfiani pisariaqarpoq pikkorissunik ilisimasaqarluatunillu Kalaallit Nunaata folketingimi sinniisoqarnissaa. Inuit kalaallinik inuiaqatigiinnik sullisserusuttut, nutaanik isumassarsiorsinnaasut, angorusutatta Kalaallit Nunaata ilinniarsimasunik inoqartup sinniisorisinnaasai, sassassapput.
Soorunami tamatta ataasiakkaarluta partiigut sinnerlugit sassarpugut, tupinanngitsumillu tamatta immikkut patiitta politikkia illersorusupparput. Eqqaamatiguli Kalaallit Nunaata Folketingimi sinniisaata nunalu tamakkerlugu politikerit suliassaat assigiinngitsuummata. Folketingimi Kalaallit Nunaata soqutigisai avammut nittarsaanneqassapput tamatumunngalu atatillugu Demokraatini Kalaallit Nunaanni innuttaasut tamaasa ajunnginnerpaamik kissaattuaannarpagut, Aviaaja Karlshøj Poulsen oqarpoq.