Partiit KNR-ikkut ilisaritinnissaat
Partiit qinigassanngotitaat sapaatip akunnerata tulliani ataasinngorpat sisamanngorpallu KNR-ikkut sammineqassapput
Unnukkut ’Qanorooq’ nal. 19.00 KNR-ikkut aallartissutigineqartassaaq, minutsillu 15-it qaangiukkaangata qinersinermik sammisaqarneq partiit namminneq TV-kkut ilisarititsisutaat aallarniutigineqartassaaq.
Tamatuma kingorna partiit qinigassanngortitaat apeqqarissaarfigineqartassapput, siullermik kalaallisut kingorna qallunaatut. Aallakaatitaq radiokkut TV-kkullu ataatsikkut aallakaatinneqassaaq.
Aallakaatitassat tulleriiaarnerat:
Ataasinngorneq septembarip 5-anni Inuit Ataqatigiit siulliullutik KNR-ikkut sammineqassapput.
Marlunngorneq septembarip 6-anni Atassut.
Pingasunngornermi septembarip 7-anni Demokraatit.
Sisamanngornermi septembarip 8-nni Siumut.
Kisermaanik qinigassanngortittoqassappat, taakkua tallimanngornermi septembarip 9-anni TV-kkut ilisaritinnissaminnut periarfissaqassapput.
Ataasinngorneq septembarip 12-anni partiineersut marlukkaarlugit oqallitsinneqartassapput.
Marlunngorneq septembarip 13-anni partiit apeqqarissaarfigineqarnerat.
Qinersinermi sisamanngorneq septembarip 15-ianni radiokkut TV-kkullu ataatsikkut toqqaannartumik aallakaatitsisoqassaaq, pisarnertut partiit siulittaasuisa oqaloqatigineqarnerannik naggaserneqartussamik.
Qinersineq KNR-imi radioaviisikkut, internetsikkut kiisalu radiokkut Iterluarnaami kiisalu Nunarput ullumi-mi malinaffigineqassaaq.