Nunarsuatsinni eqqissisimanarnerpaaq

Nunanut allanut ministeri Lene Espersen ippassaq oqarpoq, Kalaallit Nunaanni illersornissamut aaqqissuussat annertusarnissaat pilersaarutigineqanngitsoq, naalakkersuisulli siulittaasuata upalungaarsimanermi piareersimatitat annertusarneqarnissaat pillugu isumaqatigiissusiorusuppoq

Lene Espersen-ip Kuupik Kleist aamma Kaj Leo Holm Johannesen peqartigalugit, Issittumi suleriaasissatut pilersaarut ippassaq saqqummiuppaat. Ass.: Roth

Nunanut allanut ministeri Lene Espersen naalakkersuisullu siulittaasuat Kuupik Kleist Savalimmiuni naalakkersuisut siulittaasuat Kaj Leo Holm Johannesen peqatigalugu, Danmarkip naalagaaffiani 2011-miit 2020-p tungaanut Issittumi periusissatut pilersaarut nunat aallartitaannut, atorfilinnut tusagassiortunullu 180-nit amerlanerusunut saqqummiussivigaat.

Kalaallit Nunaanniit ukioq ataatsip matuma siorna aallartisarneqartup kinguneranik 58-inik quppernilimmik pingasuullutik politikkiminnik saqqummiinertik tulluusimaarutigalugulu nuannaarutigaat.

Pilersaarut, killeqarfiit ataqqineqarnissaannut alapernaarsuinermullu ilaatigut tunngasoq suli aningaasartalersorneqanngilaq.

- Naalagaaffiit Issittup imartaani killeqarfillit qanittumik suleqatigiikkaluartut, killeqarfiit ataqqineqarnissaat isumagineqartuartariaqarpoq, minnerunngitsumik tamaani angallattut amerliartuinnarnerat eqqarsaatigalugu. Pilersaarutip immikkoortaasa ilaat qulequtaqarpoq "Issittoq eqqissisimanarlunilu isumannaatsoq", tassani ilaatigut allassimavoq illersornissamut angallatit ersarissumik killeqarfiit ataqqineqarnissaannik suliaqartut alapernaarsuillutillu.

Saqqummiinermi nunanut allanut ministerip Lene Espersen-ip Sermitsiamut erseqqissarpaa, Danmarkimi naalakkersuisut Issittumi sakkutuulersorusunngitsut, isumaqatigiinnginnerillu tamarmik eqqissilluni isumaqatigiinniarnikkut anguniarneqartassasut.

- Nunanut allanut ministeri Lene Espersen saqqummiinerup kingorna oqarpoq, ajornartorsiutaasinnaasut tamarmik manna tikillugu isumaqatigiinniarnikkut qaangerneqartarsimasut siunissamilu taamatut ingerlariaaseqartoqartariaqartoq.

-Issittoq nunarsuatsini eqqissisimanarnerpaajuaannassammat tamaani sakkutuulersorluta iluarsiissuteqartarusunngilagut, nunanut allanut ministeri Lene Espersen oqarpoq.

Siunissaq ungasinnerusoq eqqarsaatigalugu naalagaaffeqatigiit nunarsuatsinni sakkut atomitortut ikilisarneqarnissaat suleqataaffigigaat, nunanut allanut ministeri oqarpoq.

- Sakkut atomitallit Issittumi taamaallaat atorneqartikkusunngilagut, nunarsuatsinnili tamani taakkua atorneqarunnaarnissaat suleqataaffigaarput, Espersen oqarpoq.

Qallunaat naalakkersuisuisa upernaaq aalajangerpaat illersornissamut qullersaqarfik 2 miliaarti koruuninik sipaarfigineqassasoq. Kalaallit Nunaannili isumagisassat sipaarniarnermit sunnerneqassannginnerat naalakkersuisut qulakkeerpaat:

– Saqqummiinerup kingorna Kuupik Kleist oqarpoq, Nunatta Issittullu sinnerata imartaani suliniutit, sipaarniarnernit sunnerneqassanngitsut qallunaat naalakkersuisa neriorsuutigisimagaat.

Kleist-p saqqummiinermi oqaatigaa, Kalaallit Nunaanni sakkutuulersornerunissaq kissaatigalugu. Arlaannik ajutoornernik pisoqassangaluarpat ikiorsiinissatsinnut maannakkungallartoq naamattunik piareersimasuuteqanngilagut.

- Arlaannik ajutoortoqaraluarpat ajunaarnersuarmilluunniit pisoqaraluarpat, qallunaat sakkutuuisa maannakkut isumagisinnaasaat naammanngitsut apeqquserneqarsinnaanngilaq. Umiarsuit takornarianik angallassisut amerlanerusut siunissami tamaani angalasalerpata, qanoq annertutigisumik pisariaqartitsineq takuneqarumaarpoq, Kuupik Kleist oqarpoq.

Nunavummi naalakkersuisut siulittaasuat, Eva Aariak, Kuupik Kleistitut isumaqarluni, ippassaq aamma nalunaarpoq, Nunavummi najugaqarfiit eqqaanni sakkutooqarnerusariaqartoq. Arfininngormallu Resolute Bay-ip eqqaani timmisartup nakkarnerata takutippaa.

Powered by Labrador CMS