Pisuttuarfinni allagarsiissutit
Ilulissat kangerlani pisuttuartut amerliartuinnarmata, pisuttuarluni aqqutigisinnaasat aaqqissuunnerat pitsanngorsarneqarpoq
UNESCO-p Nunarsuarmiut kingornussaattut nalunaarsorneqarneq akisussaaffimmik nassataqarpoq, Qaasuitsup Kommunia tusagasiuutitigut nalunnaarummini taamatut allappoq.
Taamaammat nuna nunarsuarmisoqatigiit kingornussaattut nalunaarsukka angallavigalugu aqqutissat ukiuni kingullerni aaqqissuulluarneqarput. Tassunga atatillugu pisuttuartut aqqutigisartagaasa aallartinneranni suliarilluakkanik tallimanik allagarsiisoqarpoq.
Allagarsiissutini pisuttuartut aqqutissaat, pisuttuarfiit qanoq takitigineri, aqqutissat qalipaasersorsimaneri kiisalu pisuttuarfigisinnaasat tamarmik nalunaarsorneqarsimapput. Pisuttuarfigisinnaasanik ilisimatitsissutit kanngussammik sanaajupput, ninngusuut suliarilluakkat, taakkua piffissap ingerlanerani isikkuat killerunnaarluni saviminerpalaalissaaq, taamatut Qaasuitsup Kommunia nalunaaruteqarpoq.
Allagarsiiortorneq Ilulissat kangerluani pisuttuartunut paasititsiniaanermut ilaapput, saniatigut aamma nittartakkakkut, dvd-liakkut, allagarsiinikkut, quppersagaliornikkut kiisalu TV-kkut aallakaatitassiornikkut paasititsiniaasoqarpoq. Nunarsuarmioqatigiit kingornussaattut nuna nalunaarsukkap isaariaani suli pingasunik 2012-imi allagarsiinissaq pilersaarutigineqarpoq.
Allagarsiiortornerit tamarmik qallunaat avatangiisit pillugit nakkutilliisoqarfiata tapersiinissaminut aaqqissuussaanit DANCEA-mit akilerneqarput.