Nikotin-itoqqusinngitsut 30.000 koruuninnassapput

PAARISA-p "2011-mi atuaqatigiit pujortartanngitsut" unammisilerpai

Atuaqativit akornanni pujortartartoqaqaa? Akkakkutit imaluunniit atsakkutit pujortartarpat? Imaluunniit meeqqanik ilaannikkut cigaretsimik ikitseriarlutik putsumik ilummoorussisartunik nalunngisaqarpit?

Taakkua puaannut ajoqutaavoq, meeqqalli atuarfianni akunnattuni atuartuullutit "2011-mi atuaqatigiit pujortartanngitsut" unammeqataaffigigukkit, 30.000 koruuninik eqquinissannut periarfissaqarputit.

Unammisitsinerup siunertaraa, meeqqat ulluinnarni ussernarsinnaasunik naapitaqartaraluarlutik suut peqqinnarnersut ilisimaaralugit peqqinnartunik qinigaqarsinnaasarnissaannut kaammattornissaat. Atuaqatigiit pilersitserusussutsimikkut peqataarusunnermikkullu peqqinnartunik susassaqarneq paasissutissiinerlu immikkut sammissavaat.

Unammisitsinermi atuaqatigiit atuaqatiminnik, meeqqanik allanik, angajoqqaaminnik, allanik ilaquttaminnik allanillu pujortartartunik pujortarunnaartitsiniaallutik aaqqissukkamik sulissuteqassapput. Atuaqatigiit pujortarunnaartitsinerpaat ajugaassapput, taamatut PAARISA tusagassiuutinut allagaqarpoq.

Atuaqatigiit unammeqataaniartut pingasunik piumaffigineqarput:
- Atuaqatigiit tamarmik unamminerup naammassinerani pujortartassanngillat.
- Atuaqatigiit suliniutigisimasaat iliuuserisimasaallu nalunaarusiarineqassapput.
- Atuaqatigiit pujortarunnaartissimasaat pujortarunnaariartuaarsimanertik allakkatigut, assitigut imaluunniit naatsumik video-liakkut uppernarsaateqassapput.

Unamminermut peqataaniartut kingusinnerpaamik septembarip aallaqqaataani 2011 nalunaassapput.

Paasissutissat allat www.paarisa.gl aqqutigalugu atuarneqarsinnaapput.

Powered by Labrador CMS