Nannut qeqertaat nanoqanngitsoq
Pingajussaanneertut iluatsitsisarput. Ejnar Mikkelsen-imut ilaallutik Isbjørneø-mi erfalasunik taarsiiniartillutik pingajussaannik iluatsitsisut taamatut oqarput
Pingajussaannik iluatsitsisarput. Kalaallit Nunaata kitaata avannarpasinnerusortaani aasaanerani Ejnar Mikkelsen-imut ilaallutik Careyøerne-mi kalaallit qallunaallu erfalasuannik Isbjørneø-miittunik taarsiniartut pingajussaannik misiliillutik iluatsitsipput.
Careyøerne Kalaallit Nunaata kippasinnersaartarai. Qeqertaaqqat arfinillit ateqarput Nordvestø, Mellemø, Fireø, Bordø, Bjørlingsø aamma Isbjørneø, taakkualu saniatigut tamaani Pituffimmiit kimmut 100 kilometerisut ungasitsigisumi ikkarluppassuaqarlunilu qattuneqarpoq.
Qeqertani najugaqartoqanngilaq, uumasorpassuaqarpoq - ilaatigut nunarsuatsinni uumasortuumasut annersaat nanoq tamaaniilluni. Nordvestø-mi inuttaqanngitsumik silasiorfeqarpoq qeqertallu qiterlersaanni, Isbjørneø-mi, qattunermi 70 meterisut qatsitsigisumi kalaallit qallunaallu erfalasui napapput.
Qeqertat Kalaallit Nunaannut ilaaneri Danmarkillu naalagaaffianit pigineqarneri takussutissaqartinniarlugu kalaallit qallunaallu erfalasui tamaani napparneqarsimapput. Erfalasut erfalasulerfiillu ukiup ingerlanerani nungullartaramik ukiut tamaasa iluarsaanneqarlutillu taarserneqartarput. Umiarsuit GLK-mit ingerlanneqartut ukiut tamaasa Isbjørneø-mut taarsiiaartortarput.
EJMI-mut ilaallutik erfalasunik taarsiiartoraluartut siulliit nannumit akornuserneqaramik qimaannarsimavaat. Tullianik taarsiiartortut tikimmata putsersimaqaaq - isikkivilutsigisoq nannumik naapitaqariataaqinagamik aamma taakkua aallaqqiinnarsimapput. Aggustip sisamaanni 2011, pingajussaannik misiliisut tikimmata isikkivigillunilu nanoqanngimmat, EJMI-mi inuttat kiisami erfalasunik taarsiisinnaasimapput.