Kelloggs cornflakesit pillugit salluliorpoq

Ullaakkorsiusiutinik tunisassiorfik Kellogg's eqqunngitsumik cornflakesit ilaasa nappaatinut inooriaatsimik aallaavilinnut katsorsaatigineqarsinnaasut oqaatigai

Kellogs All Bran.

Nunarsuatsini ullaakkorsiutinik tunisassiorfiit annersaasa ilaat, Kellogg's, cornflakesit All-bran-it nappaatinut inooriaatsimik aallaavilinnut katsorsaataasinnaaneraanini pillugu nerisassanik nakkutilliisoqarfimiit akiliisinneqarpoq.

Qallunaat aviisiat B.T. taamatut allaaserisaqarpoq.

Nunani avannarlerni immikkoortortaqaarfik, Nordisk Kellogg's ullaakkorsiutit taakkua pillugit immikkut allaaserisami ilaatigut nittartakkamini allappoq "Fiberit (ipaasat) nappaatinut inooriaatsimik aallaavilinnut katsorsaataasinnaasut", tamaalillutillu fiberit kræftimut, uummatip taqarsuakkut nappaatinut, anarneq ajulertunut kiisalu naakkut manngertittoornernut katsorsaataasinnaasoq. Kisianni tamakkua allaaserineqartut ullaakkorsiutinik tunisassiorfiup uppernarsarsinnaanngilai, taamaammat nerisassanik nakkutilliisoqarfiup juunip 8-ni tunisassiorfik 15.000 koruuninik akiliisikkaa, nakkutilliisut pisortaat Rikke Hansson aviisimut opqarpoq:

- Nerisassat meqqilernerisigut allatigulluunniit nappaatinut assigisaannulluunniit akiuussutaasinnaanerat imaluunniit pinaveersaarutaasinnaanerat tunisassiortut allattussaanngilaat, tamanna EU-mit taamatut allagartalerneqarsinnaasutut nalilersimanngippagu.

Nerisassanik nakkutilliisoqarfimmeersut juunimi siullermik aqqusaarnerminni Kellogg's-ip cornflakesiliani pitsaavallaaluatsiartumik allaaserisimagaat malugaat. Tullianillu aqqusaarnerminni Nordisk Kellogg's-ip allaaserisami oqaasertai allanngortissimanngimmagit akiliisinneqarpoq.

- Tunisassiorfimmi akisussaasut oqaraluarput, qarasaasialerisumik suli piffissaqarfigisimanngikkat. Taavami nittartagaq matuinarsinnaavaat. Aammami aappassaanik aqqusaaratta taamaaliorput, Rikke Hansson oqarpoq.

Cornflakesinik tunisassiorfimmi akisussaasut kukkunertik nassuerutigalugu nittartagaq matuaat, taarsiullugulu allallutik, ullaakkorsiutit taakkua imaassinnaasoq kræfteqarnermut taqqanillu milittoornernut pinaveersaarutaasinnaasoq.

- Nerisassanik nakkutilliisoqarfiup nittartakkami allbran.dk-mi allassimasut malittarisassanik unioqqutitsinertut nalilersimavaat. - Nittartakkami qupperneq pineqartoq matuarput, tusagassiisarnermut pisortaq, Vibeke Haislund B.T.-mut oqarpoq. /ritzau/

Powered by Labrador CMS