Naqitat nutaamik ulluinnarni aqutsisoqalerpoq
Arnaq misilittagaqarluartoq naqiteriviup qullersaannut ilannguppoq
Emma Junge Dalager naqiteriviup Naqitat ulluinnarni aqutsisorilerpaa.
- Emma-p ulluinarni aqutsisuulerneratigut allanillu pikkorissunik sulisoqarnitsigut, pitsaasumik ingerlanissarput qulakkeerparput, taakkua suliffik suliassagullu, kiisalu minnerunngitsumik sullitagut inuiaqatigiillu ilisimaarilluarpaat, pisortaq Sven Lyse tusagassiuutitigut nalunaarumini allappoq.
Maannakkut qullersat tassaalerput Emma Junge Dalager, ulluinarni aqutsisoq kiisalu pisortaq Sven Lyse.
Emma Junge Dalager 1996-imi naqiterivimmi atorfinippoq suliffeqarfimmilu suliassat assigiinngitsut amerlanerit isumagisarinikuullugit.
Ukiaru septembarimi Naqitat nutaanik naqiterivittaassamaarpoq immikkullu pingasunik tunisassiorfeqalissalluni. Taamaalilluni naqiterivik nunani allani naqiterivinnut unammillersinnaalernissani neriuutigaa.