Piumassuseqarluarlutik tusarnaartitsipput
Small Time Giants Tivoli-mi tusarnaartitsinnginnermini pissangarrapput
Tivolimi kalaallit katerisimaaqataasut ilaatigut rockimik nipilersortartut Small Time Giants tusarnaarpaat. Taakkua erinarsortuata Mike Jensen-ip piumassuseqarluarlutik qaqinertik imatut oqaatigaa.
- Tusarnaartut nipilersortartunik misigissuseqarluartunik, anersaanissimaarlutik piumassuseqarluartunik takupput, Mike Jensen oqaluttuarpoq.
Nipilersoqatigiit ullumikkut Århus-imi najugallit Qaqortuminngaanneersulli, Tivolimi Plænen-imi unnukkut nalunaaqutaq qulingiluap tungaanut nipilersorput.
– Siornatigut taama angitigusumik tusarnaartitsiveqarnikuunnginnatta pissangasorujussuuvugut. Sapaatilli akunerini kingullerni marlunni sungiusarluarnikuuvugut. Kalaallit Nunaanni suli tusaamasaanngikkaluarluta, erinarsuutivullu tusarnaatut akornanni ikittuinnaat nalunngikkaluaraat, Danmarkimilu tusarnaartitsisarfiit annersaasa ilaanni nuannersumik misigisaqartitsisinnaalluta, Tivolimi tusarnaartut takutikkusussimavagut, Mike Jensen oqaluttuarpoq.
Videomi YouTube-mi takuneqarsinnaasumi Small Time Giants siorna maajip qaammataani Bryggen-imi nipilersornerat takuneqarsinnaavoq.