Norge-mi alianartumik pisoqarnera pillug suut tamarmik unipput

Anders Breivik-ip Oslo-mi Utøya-milu toqutai eqqaaniarlugit Norge-mi Skandinaviallu sinnerani minutsimi ataatsimi nipaallisimasoqarpoq

En meningsmåling i Norge viser, at Arbeiterpartiet stormer frem. Foto: Polfoto

Tallimanngormat tupinnaannartumik paasiuminaatsumik toqutaasut amerlaqisut, ataasinngormat ullup qeqqanut Norge tamakkerlugu eqqaaniarneqarput.
Norgemi toqutaasorpassuit qaqugorsuarmut eqqaamaneqartussat, nuna tamakkerlugu aliasuutigineqarput.

- Naalakkersuisoqarfimmi Utøya-milu toqutaasut eqqaaniarlugit nuna tamakkerlugu minutsimi ataatsimi nipaallisimasoqarnissaa matumuuna nalunaarutigaara, ministeriuneq Jens Stoltenberg oqarpoq. Taassuma nuliani, Norgemi kunngikkormiut, politikerit nuimasut inupparujussuillu allat Oslo-mi universitetip eqqaani illoqannginnersami katersuussimapput.

Taamaalinerani Norge tamakkerlugu nipaallisimasoqarpoq. Qimuttuitsut unipput, Oslo-mi pappialanik nalilinik nioqquteqarfik unikkallarpoq kiisalu naalagaaffiup aqqusinerni isumaginnittuutitaasa biilertut tamaasa nal. 12.00-imiit 12.01-ip tungaanut aqquserngit sinaanni uninngaqqullugit kaammattorsimallugit.

- Qujanarujussuaq, minutsi qaangiummat ministeriuneq Stoltenberg oqarpoq.

Tamatuma kingorna Norgemiut kunngiat, dronningiat kiisalu Arbeiderpartiip inuusuttaasa kattuffianni siulittaasoq, Eskild Pedersen, universitet-imi katerisimaartarfimmut isaallutik misiginneqataasut pisortatigoortumik allattuiffigisaannut allakkiartorput.

Danmark-imi nunanilu avannarlerni tamani aamma, toqutaasorpassuit eqqaaniarlugit, minutsimi ataatsimi nipaallisimaffiupput.

- Nunani avannarlerni tamani nipaallisimaneq misigisarput, toqutaasunut pingaaruteqaqisumik ataqqinnilluta eqqaaniaaniarnitsinnut takussutissaavoq, kiisalu qimataasunut ikiligaasunullu alianaqisumik misigisaqartunut misiginneqataanitsinnik takutitsinerulluni, Stoltenberg Norgemi TV2-mut oqarpoq.

Misiginneqataasut allattuiffiat universitet-ip katerisimaartarfianiisinneqarallassaaq, kikkunnit tamanit allaffigineqarsinnaassalluni.
Norge-mi sumiiffinni assigiinngitsuni atsiornermikkut misiginneqataanerminnik takutitsiniartut periarfissinniarlugit allaffissaqartinneqarput.

Powered by Labrador CMS