Sedna-p kunngikkormiut serpaliffigai

Nanoq Beer Greenland-ip namminneq immiukkaminnik tunisassiorsinnaaleramik, dronning Margrethe aamma Prins Henrik sapaatiummat ammaanersiortippaat.
Narsami immiorfimmik piginnittut immiortuatalu qanoq immiussanerlutik eqqarsaatigilluarsimavaat.
Immiorfiup Sedna brown ale-mik immiorfissap qaavanut kunngikkormiut qaqillutik immiugaq kuannerpassuarnik akoriarlugu immiugassanik akuaat.

Immiugaq pujuualaartoq prins Henriup sukkavallaamik sungarnitsulersimagunarlugu tassanngaannaq immiaaqqamik serpaliffigitippoq.

- Uhh!, dronning Margrethe nillerpoq.

Prinsi sakkutuut naalagaanerattut admiralitut atukkersorsimasoq kiinnamigut atisamigullu immiaaqqamik serpaliffigitippoq.

Immiugaq qalaarsoralugu kunngikkormiut paarsisui aarleqqutsakkaluartut immiortup kissalaaginnarnerarlugu eqqissisapallappai.

Ajutuutsiarneq kunngikkormiut illaatigiinnarpaat. Margrethe-p uimi kiinnaniit immiaaraq allarterlugu oqarpoq, jakkia qernertoq soriarsinnaanagu.

- Imerniartarfittut tippassaatit, dronningi illarluni oqarpoq.

Nanoq Beer Greenland-ip immiaaqqat assigiinngitsut pingasut, brown ale, Sedna, juullip immiaaraa, Polaris kiisalu pale ale, Nanook, Nunatsini Danmarkimilu nioqqutigilissamaarpaat.

Immiorfiutillit immiorfiulli atortui pisiarigamikkit aallaqqaammut immiorfiup aappaa ajornartorsiutigisimavaat. Inuiattut ullorsiornitsinni immiorfiutillit Narsarmiut immiukkaminnik usiitissamaarsimagnaluarpaat, immiorfiulli aappaa ajoquteqarmat taamaaliorsinnaasimanatik. Maannakkulli 1 miliuuni koruuneerlutik iluarsaassereerlutik tunisassiorsinnaalerput.

Tulliani Sermitsiaq saqqumerpat Nanoq Beer Greenland-ip aallartinnera immiortullu apersorneqarnera atuarsinnaassavat.