Umiarsuit takornariartaatit Qaqortumut tikittut siullersaat

Umiarsuit takornariartaatit ukioq manna siullersaat ullumi Qaqortumut tikippoq

Saamerlerniit tassaapput takornarianut ilisimasortaasartoq, Marthannguaq Rasmussen, takornariaqarnermi pisortaq Edda Lyberth , borgmester Simon Simonsen, qilaatersortartoq Jeremias Sanimuinnaq, Greenland Sagalands-imi pisortaq Pitsi Høegh kiisalu Mikko, Kristina Katarina-mi naalagaasoq. Ass.: Greenland Sagalands

Sikorsuit akornutigalugit pingasoriarluni taamaatitsiinnartoqartareersoq, umiarsuit takornariartaatit ukioq manna siullersaat, ullumi Qaqortumut tikippoq. Greenland Sagalands-imi pisortaq, Pitsi Høegh taamatut nalunaarpoq.

Kristina Katarina, Finland-imi Kristina Cruises-imeersoq ullumi juulip 18-ianni nal. 13:00 Qaqortumut tikippoq.

Umiarsuaq nutaajullunilu tikittartunit annerummat, borgmesterip Simon Simonsen-ip tikilluaqqusinermini Kommune Kujallermiit tunissuteqarfigaa.

Tamatuma kingorna Jeremias Sanimuinnaq inngerluni umiarsuarmi ilaasut aliikkusersorpai.

Takornariaqarnermut pisortap Edda Lyberth-ip nuannaarluni inuiaqatini illoqarfimmut tikilluaqquai.

Takornariat amerlanerit Finland-imeersuupput Rusland-imeersuullutillu. Takornariat illoqarfimmi takornariartinneqarput, kiisalu ullumi aqagulu juulip 19-ianni ilaqutariinnut kaffisoriartassallutik.

Powered by Labrador CMS