2011-mi kapisilinniarnerup aallartinnera
Inuussutissarsiutigalugu aalisartut, kalaalimineerniarfinnut, ingerlatsivinnullu, soorlu napparsimmavinnut, akunnittarfinnut, sutorniartarfinnut, ilinniarfeqarfinnullu tuniniagassaminnik kapisilinniarsinnaapput
KNAPK isumaqatigalugu kapisilinniarnissaq 2011-mi sapaammi aggustip aallaqqaataani aallartissaaq, sapaatikkullu oktobarip 31-anni 2011 unitsinneqassalluni.
Piffissap taassuma avataani kapisilinniarneq inerteqqutaavoq, tamatuminngalu unioqqutitsisoq akiliisinneqassaaq pisaanillu arsaarneqassalluni.
Ukiuni siuliini pisarnertut, inuit namminneq pissaminnik kapisilinniarnissaat, Naalakkersuisunit aamma akuersissutigineqarpoq. Inuussutissarsiutigalugu aalisartut, ukioq manna aamma kalaalimineerniarfinnut sumiiffimminnilu ingerlatsivinnut, soorlu napparsimmavinnut, akunnittarfinnut, sutorniartarfinnut, ilinniarfeqarfinnut assigisaannullu tunisassaminnik kapisilinniarsinnaatitaassapput.
Tunisassiorfinut avammullu nioqqutissanik tunisineq tamarmi inerteqqutaavoq. Taamatut inerteqquteqarneq ukiuni arlalinni maanna atuussimalerpoq, taamatullu inerteqquteqarneq Atlantikup avannaani kapisileqassutsip illersorneqarnissaa pillugu atuutilersinneqarnikuuvoq.
Kapisilinnik kalaalimineerniarfinni sumiiffinnilu suliffeqarfinnut tunineqartussanik aalisarsinnaaneq akuersissummik peqarnissamik piumasaqaateqarpoq. Kapisiliniarnermut akuersissutit kommunimi qinnutigineqassapput. Kapisilinniarluni aalisarnissamut akuersissutit akilersinneqarneq ajorput.
Pisat tunisallu tamarmik Aalisarnermut Akuersissutinik Nakutilliisoqarfimmut, KANUAANA-mut, nalunaarutigineqassapput. Pisanik nalunaarnermi immersugassaq kommunimi imaluunniit www.nanoq.gl/GFLK iserfigeriarlugu "Aalisarnermut akuersissutinik nakkutilliiveqarfimmut qinnuteqarnermi immersugassat" tooriarlugu, quppernermilu tassaniittoq "Kapisiliniarneq" toorlugu pissarsiarineqarsinnaapput.
Kapisilinniarneq pillugu maleruagassat Namminersornerullutik Oqartussat nalunaarutaat nr. 21, 10 august 2002-meersumi takuneqarsinnaapput.