Meeqqanik suliniuteqarneq sipaarniuteqarfiusoq
Paamisaarineruvoq Palle Christiansen isumaqarmat atuarfeqarfimmi sipaaruteqartoqarsinnaasoq, Juliane Henningsen, IA, oqarpoq - siusissukkut suliniuteqarneq akeqarpoq
- PPR-imik ingerlatsiviup, siusissukkut suliniuteqarnissamik aallaavillip aamma meeqqanut suli atualersimanngitsunut, annertusinissaanik kissaatigisarput aalajangiusimassagutsigu annertunerusumik suliniuteqarnikkut soorunami aningaasartuutit amerlissapput, Juliane Henningsen tusagassiorfinnut nalunaarummi allappoq.
Taanna isumaqarpoq Palle Christiansen kukkulluinnartoq isumaqaruni specialskole annertunerusumik sipaaruteqarfigineqarsinnaasoq.
- Uggornarpoq ajornartorsiut taama annertutigisoq aningaasanik sipaaruteqarnissamik apeqqutinngortinneqarmat. Tamanna pimoorussinerunngilaq sulisorpassuarnullu angajoqqaanullu, qitornamik ikiorneqarnissaannik ulluinnarni sorsuutiginnittunut, narrujuumminarsimassalluni.
Immitsinnut aperisariaqarpugut aningaasat eqqortumik atornerivut. IA isumaqarpoq aningaasat atorneqartariaqartut anguniagalimmik immikkut atuartitsinermut ilinniartitsisullu piginnaanngorsarnissaannut. Ajoraluartumilli aningaasat ullumikkut aamma atorneqartartut meeqqanik immikkut pisariaqartitsisunik piginnaasaqanngitsumik atuartitsinermut. Tamatumunnga ilaatigut pissutaapput ilinniartitsisunik immikkut piginnaasalinnik amigaateqarneq, atortunik amigaateqarneq atuartunillu immikkut pisariaqartitsisunik atuartitsinermi »annertuumik ingerlatsinermi iluaqutissat« angunissaannut ajornartorsiuteqarneq.
IA Kanukoka-tut allatullu isumaqarpoq tamanna misissoqqittariaqartoq. ukiumut 52 millioner koruunit atortarpavut ajoraluartumillu amerlanertigut maangaannartarput. Apeqqusissavarput immikkut ittumik atuartitsineq annertunerusoq maannakkorpiaq kommuninut tunniutissaneripput. Nuna tamakkerlugu suliniuteqartoqartariaqarpoq ilisimasalinnillu tamanna misissuiffigeqqissaarneqartariaqarpoq annertunerusumik iliuuseqannginnitsinni. Kisiannili saneqqunneqarsinnaanngilaq siunissamissaaq atuartunut innarluutilinnut specialklassinik specialskolinillu peqassammat. Tamannalu aningaasanik akeqarpoq.
PPR-imi immikkullu atuartitsinermi annertunerusumik suliniuteqarnissamut IA aningaasanik amerlanerusunik perusuppoq, suliarlu tamanna kivinneqassaaq kommunit suleqatigalugit.