Siorapaluk siullermeersumik

Siusinnerusukkut kunngikkut aasaanerani nunatsinni angalanersuarminnut atatillugu Siorapaluk tikeraassallugu pilersaarutigisaraluarpaat. Tamatigulli tikeraarnissaq piffissaq kingulleq atorlugu taamaatiinnarneqartarpoq silamik pissuteqartumik. Tamatigut helikopterimik Siorapaluk tikinniarneqartaraluarpoq. Tikeraarnissaa taamaatiinnarneqarpoq 1989-imi, 1997-imi 2004-milu.

Umiarsuaq alapernaarsuut nutaaq Ejnar Mikkelsen iluaqutigalugu maanna ilimanarpoq dronningip uiatalu prinsip kiisami naalagaaffeqatigiinni nunaqarfiit avannarlersaat tikissagaat.

Naatsorsuutigineqarpoq Ejnar Mikkelsen PItuffimmit unnugu aallassasoq, sakkutooqarfimmi pisortatigoortumik nereqatigiinnerup kingorna, nunaqarfimmullu tikissaangatinneqarluni ataasinngorpat ullaakkut nal. 8.

Siorapalummi kunngikkut Kuupik Kleistimit nunaqarfimmilu siulersuisunut ilaasortamit Patdloq Henriksenimit tikilluaqquneqassapput.

Tamatuma kingorna nunaqarfimmiut atuarfimmi kaffisoqatigineqassapput.

Nunaqarfimmullu tikeraarneq naggaserneqassaaq aappariinnut kalaallimut-japanimiumut Anna aamma Ikuo Oshimamut pulaarluni. Oshima, japanimiu, ukiuni 36-ini Avannaani piniartutut inuusimavoq.

Tamatuma kingorna Ejnar Mikkelsenip kunngikkut Qaanaamut ingerlatissavai tassani Qaasuitsup Kommuniani kommunalbestyrelsimut ilaasortamit Jens Danielsenimit tikilluaqquneqassallutik. Kunngikkut Nukissiorfiit imeqarfiat pulaassavaat tassani ilulissat aatsinneqartarlutik.

Tamatuma saniatigut kunngikkunnut naalakkersuisullu siulittaasuannut tivanermik takutitsisoqassaaq, erinarsoqatigiit erinarsussapput qitinnermillu takutitsisoqassalluni.

Kunngikkut aqagu Qaanaamiit Upernavimmut timmisartussapput naatsorsuutigineqarluni nal. 19 tikissasut, tassani Dannebrog utaqqisoq. Upernavimmit kunngikkut kujammut umiarsuassapput Aasiannut, aqqutaani nunaqarfiit illoqarfiillu arlallit uniffigineqartassallutik.

Kunngikkut tikeraarnerannit programmi tamaat takuuk ilanngussami pdf-filimi.