Assortuupput

Siumup Demokraatit pasillerpaat oqqanik marlunnik oqalunnerarlugit, Anda Uldumili taamaattoqannginneraavoq

- Nuummi umiarsualiviup containerersorfiup misissueqqaarfigineqarnissaanut Jens B. Frederiksenip aningaasanik qinnuteqaataa Aningaasanut Ataatsimiititaliami tapersersimavara, Anda Uldum Demokraatineersoq Sermitsiaq.AG-mut oqarpoq.

- Apeqqutissaqarsimavunga ataatsimiinnerup nalaani qulaajarneqartunik, tamatumalu kingorna isumaqataallunga taasivunga, taanna oqarpoq.

Taamaattumik iluumminnginnerarpaa Aningaasanut Ataatsimiititaliap isumaqatigiissup Jens B. Frederiksenip qinnuteqaataa itigartissimagaa.

Maanna Siumup siulittaasua Aleqa Hammond Siumullu Aningaasanut Ataatsimiititaliami ilaasortaatitaa Finn Karlsen tusagssiorfinnut nalunaarutikkut oqarpoq Demokraatit oqqat marluk atorlugit oqaluttut, Anda Uldumilu qinnuteqaammut itigartitsilluni taasisimasoq.

- Aningaasanut Ataatsimiititaliap isumaqatigiissup Jens B. Frederiksenip Nuummi containereqarfimmik misissueqqaarnissamut qinnuteqaataa itigartippaa - aamma Anda Uldumip Demokraatineersup, Aleqa Hammond aamma Finn Karlsen tusagassiorfinnut nalunaarummi allapput.

Siumup itigartitsinermut, tamarmik tapersersugaannut, tunngavilersuutigai:

1. Assartuinermut ataatsimiititaliap inassuteqaatai suliluunniit kalaallisut allanneqarsimanngillat.

2. Suli politikkikkut oqallittoqanngilaq.

3.Aningaasat nunaqarfinni isorliunerusunilu sanaartugassanut atugassanit tiguniarneqarput, tamannalu akuersaarneqarsinnaanngilaq.

4. Aningaasanut ataatsimiititaliaq qinnuteqaammut tassunga akuersippat tamanna Naalakkersuisunit isigineqassaaq umiarsualiviup containerersorfiup sumiiffissaanik aalajangiinertut, politikkikkut oqallinnertaqanngitsumik.

Taamaattumik Finn Karlsenip Aleqa Hammondillu Demokraatit aperaat qanoq isumaqarnersut, tassa pisoq ataaseq pillugu Anda Uldum oqqanik marlunnik oqalummat.

Taaneqareersutulli Anda Uldum ilumuunnginneraavoq: - Qinnuteqaat akueralugu tapersersimavara, ataatsimiinnerulli imaqarnersiornerani minnerussuteqartutut oqaaseqaatimma ilanngunneqarnissaa qinnutigisimanngilara, Anda Uldum oqarpoq.

Powered by Labrador CMS