Uuliamik pisuussutit taarserlugit akileerusunngillat

Folketingimi ilaasortap Per Clausen-ip (EL) aningaasanik taarseeqqusinera silap pissusaa pillug ministerimit, Lykke Friis-imit itigartinneqarpoq

Uulia qallorneqarnaveersaartillugu aningaasanik taarsiissuteqartalernissaq Lykke Friis-ip isumaqatiginngilaa. Ass.: Rosa Thorsen

Uuliap qallorneqannginnissaa anguniarlugu qallunaat naalakkersuisui taarsiissuteqarusunngillat. Silap pissusaa pillugu ministeri Lykke Friis Per Clausen-imut Enhedslisten-imeersumut akissuteqarluni allakkamini, Kalaallit Nunaanni uuliasiorneq unitsillugu aningaasanik qallunaat naalakkersuisuisa taarsiinissaat itigartissutigaa.

- Naamik, silap pissusaata allanngoriartornera akiorniarlugu uuliaatiminnik qalluiniartut taarsiiffigalugit uuliamik qalluisikkunnaarniarsarissagutsigit, taava soqutaanngilaq uuliap Kangiani Qiterlerniittup imaluunniit sumiiffinni assigiinngitsorpassuarni uuliaatillit qallueqqunagit taarsiiffigisalissangaluarutsigit. Taamatut aaqqiiniarneq uanga tapersersunngilara, aamma nunanit tamanit tamatuma akuersaarneqarnissaa ilimaginngilara, Lykke Friis allappoq.

Folketingimi ilaasortap Per Clausen-ip (EL) 2011-mi juunip 27-anni aperivoq, issittumi, soorlu Kalaallit Nunaanni avatangiisit illersorniarlugit uuliamik assigisaanillu qalluisitsinaveersaarluni nunat tamat aningaasanik taarsiissuteqartarnissaat ministerip sulissutigerusunneraa.

Powered by Labrador CMS