Kalaallit angerlakaatittariaqarpagut

- Kalaallit ilinniarluarsimasut Danmarkimi najugaqartut Nunatsinnut utertittariaqarpaug, Juliane Henningsen oqarpoq

Juliane Henningsen: Kalaallit ilinniarluarsimasut Danmarkimi najugaqalersimasut angerlartariaqarput, Kalaallit Nunaanni atorfissaqartippagut. Ass.: Leiff Josefsen

Kalaallit Nunaata unammilligassaasa annerpaat ilagaat, ilinniarsimasunik sulisoqarniarneq. Danmarkimi ilinniarluarsimasunik kalaalerpassuaqarpoq, qularnanngitsumik Kalaallit Nunaanni atorfippassuarnut inuttassarsiorneqartunut atorfinitsinneqarsinnaangaluartunik. Taakkuali angerlartinniarnissaat kisimi ajornartorsiutaavoq, folketingimi Inatsisartunilu IA sinnerlugu ilaasortaq, Juliane Henningsen oqarpoq.

Kalaallit Nunaanni Peqqinnissaqarfiup nittartakkakkut sulisussarsiortarfiani gjob.dk-mi takuneqarsinnaavoq peqqinnissaqarfik atorfiit 38-t inuttassarsiorneqarput. Atorfiit 20-t Sermersuup Kommuniani inuttassarsiorneqarput, Atorfiit tallimat Qaasuitsup Kommuniani inuttassarsiorneqarput, Qeqqata Kommuniani qulingiluat kiisalu Kommuni Kujalermi atorfiit tallimat inuttassarsiorneqarlutik. Namminersorlutik Oqartussani atorfiit qulingiluat inuttassarsiorneqarput. Komunit Namminersorlutillu Oqartussat nittartagaanni ujarlipallakkaanni taamaalilluni takuneqarsinnaavoq, Kalaallit Nunaanni pisortaqarfinni atorfiit 86-it inuttassarsiorneqartut. Namminersortut suliffeqarfiutaanni aamma atorfiit assigiinngitsut inuttassarsiorneqarput.

- Kalaallit Nunaanni ilinniarluarsimasunik sulisussaaleqineq naluneqanngilaq. Atorfippassuillu avataaniit, minnerunngitsumik Danmarkimeersunit inuttalerneqartarnerat aamma naluneqanngilaq. Kalaallit Nunaanni "tikisitat" pingitsooneqarsinnaanngilluinnarput. Tamannali inuiaqatigiinnut sunniuteqarpoq, Juliane Henningsen (IA), Den Nordatlantiske Gruppe-mi ilaasortaq oqarpoq.

- Atorfinittut amerlanersaat piffissami aalajangersimasumi sulinissartik isumaqatigiissutigalugu atorfinittarput - ilaat allaat, kulturikkut maannga attuumassuteqannginnertik maanilu ilaqutaqannginnertik pissutigalugu, sapaatip akunnialunnguini taamaallaat sulisussaasarlutik, tamatumalu kingorna Nunarput qimaqqittarlugu. Taamaammat suliassat ingerlaavartuarnissaat pilersaarusiornissaallu ajornakusoortarpoq. Siunissami atorfinittartut Kalaallit Nunaanneersuuppata inuiaqatigiillu ingerlariaasaannik ilisimannittuullutik - minnerunngitsumillu Kalaallit Nunaanni najugaqalerusuttuuppata - inuiaqatigiit ingerlalluarnerusinnaalissangaluarput, nammineersinnaalernissamullu ikiuutaasinnaassangaluarlutik, Juliane Henningsen tusagassiuutinut nalunaarummini allappoq.

Den Nordatlantiske Gruppe-p misissuisitsineri kingulliit takutippaat, kalaallit ilinniarluarsimasut Danmarkimi najugaqartut Kalaallit Nunaanni atorfinni inuttassarsiorneqartuni atorfinissinnaangaluartut. Naluneqanngitsutulli kalaalerpassuit angerlarnissartik kissaatiginngilaat.

Den Nordatlantiske Gruppe-p kalaallit Danmarkimi najugallit pillugit misissuisitsineri pingasut takutippaat, kalaallit 18.500-t Danmark-imi najugaqartut akornanni 3100-t namminneq nuussimanngikkaangamik taakkua angajoqqaavi nuuttarsimasut, taamaammallu ajornaquteqanngitsumik Kalaallit Nunaanni atorfinissinnaasut. Taakkua arnaallutillu angutaapput 20-niit 49-t tungaannut ukiullit, ilaat atorfillit, ilaat ilinniagaqartut kiisalu ilaat suliffissarsiortut. Taakkua minnerpaamik 80 procentii sunniuteqaataasinnaasumik ilinniagaqarnikuupput, maannakkut Nunatsinni inuttassarsiorneqartuni atorfinissinnaangaluartut.
Den Nordatlantiske Gruppe-p kalaallit pillugit misissortitai pillugit sukumiinerusumik uani atuarsinnaavutit:

Powered by Labrador CMS