Suliffissanik pilersitsissaagut
Enhedslisten-imeersup Per Clausen-ip Nunatsinni pissutsinut akulerunnera Jess G. Berthelsen-ip sakkortuumik akerlilerpaa.
Kalaallit Nunaata uuliasiorani ajunngitsorsiassinneqarnissaa pillugu, sapaatip akunnerata naanerani SermitsiaqAG-mi allaaserisap, SIK-p siulittaasua qisuariartippaa.
Uagut nammineq pisuussutit pivut pillugit inuiaat kalaallit ilinniartinniarneqartutut, qallunaat partiianniit maani tusagassiuutit atorlugit pineqarnerput tupigusuutigaara. Aatsaat taama sinnerluta iluasaarniartuusaartigisumik.. Isumaqarluni nunasiaanitta nalaani pissutsit qimanneqalersut, Jess G. Berthelsen tusagassiuutinut nalunaarummini allappoq.
Folketingimi ilaasortap Per Clausen-ip, Enhedslisten-imeersup tamanut takusassanngrlugu siunnersuutigaa, Kalaallit Nunaata uulia qallornagu taarsiullugu aningaasanik tunineqartarnissaa. Per Clausen-ip aamma qallunaat naalakkersui qinnuiginiarpai, Kalaallit Nunaata nunanik tamanik isumaqatigiissusiornissaa suliarinagu siunnersuutini aallaavigalugu suliniuteqaqqullugit.
Jess G. Berthelsen naqissuserpaa, Kalaallit Nunaata namminersortuunera namminerlu pisuussutit pillugit aalajangiisinnaatitaanera.
- Kalaallit Nunaanni aamma suliffissaaleqisoqarpoq. Taamaammat innuttaasut tamarmik iluaquserniarlugit, piaarnerpaamik suliffissanik pilersitsisariaqartugut. Suliffissallu nutaat minnerunngitsumik aatsitassarsiornermut tunngasuni pilersinneqartussaapput, SIK-p siulittaasuata nawqissuserpaa.
Jess G. Berthelsen-ip tusagassiuutinut nalunaarutaa tamaat pdf-inngorlugu ilanngussaq atuarsinnaavat.