Kunngimut Makkammullu Kulturikkut nersornaasiineq
Eqqumiitsuliortut Nunatsinni nunanilu allani malunnaatilimmik suliaqarsimasut ukioq manna Kulturikkut nersornaasissallugit Naalakkersuisut toqqarpaat
Nersornaat eqqumiitsuliortumut tamatigoortumut Frederik Kristensen, kunngimut aamma isiginnaartitsisartumut Makka Kleistimut tunniunneqarpoq.
Naalakkersuisut aalajangerpaat kulturikkut suliniuteqarluarsimasunut nersornaasiuttagaq ukioq manna eqqumiitsuliortunut nunatta iluani aammalu nunatta avataanut ukiorpassuarni malunnaatilimmik takutitsilluarsimasunut annertuumillu suliaqarsimasunut tunniunneqassasoq.
Frederik Kristensen, Kunngi, pillugu Naalakkersuisunut ilaasortaq Mimi Karlsen ilaatigut ima oqaaseqarpoq:
- Nersornaaserneqartussaq siulleq tassaavoq eqqumiitsuliortoq tamatigoortoq, imaannaanngitsoq ukiorpassuarnilu qalipakkanik assilialiortarnermigut ilisimaneqarlualersimasoq. Nammineq suliaminik arlaleriarluni saqqummersitsisarpoq aamma allat peqatigalugit nunatsinni nunanilu allani saqqummersitsisarluni, suliakkiutinik kusanarsaataasunik suliaqartarpoq titartagartalersuisarlunilu, soorlu atuakkanik aamma allagartarsualianik, juullip nipitittagaanik kiisalu suliffeqarfiit ilisarnaataannik.
Nersornaaserneqartup aappaa pillugu Naalakkersuisunut ilaasortaq Mimi Karlsen ilaatigut ima oqarpoq:
- Ilinniartitsisutut isiginnaartitsisartutullu sulinermini kalaallisut oqaatsitta atorneqarnerat ilisimanerulerneqarnissaallu pingaartittuarpai. Ilinniartitsisuunermini aammalu isiginnaartitsinermut atatillugu suliaqartarnermigut meeqqat massakkut inuusuttunngortut kalaallisut oqalulluarsinnaalersimanerat annertuumik sunniuteqarfigisimavaa.
Diplomit nersornaatillu aningaasartai Ilaqutariinnermut, Kultureqarnermut, Ilageeqarnermut, Naligiissitaanermullu Naalakkersuisup Mimi Karlsenip tunniuppai.
Nersornaaserneqartut immikkut tamarmik 25.000 koruuninik tunineqarput.
Mimi Karlsen-ip nersornaasiinermini oqaasii ilanngupput.