Sanasunngortut
Entreprenøritut ingerlatsiviup Atcon-ip sanasut nutaat tallimat, tallimanngorpat Saviminilerinermik Ilinniarfimmit soraarummeertussat ilinniagaqartippai
Sanasunngortut nutaat tallimat, Atcon-EMJ-ip ilinniagaqartissimasai tassaapput Ole Palle Sørensen, Jens Jørgen Jacobsen, Anda Johansen, Massi Svendsen aama Niels Enekvist.
Atconimi lærlingit tamarmik misilitsinnerminni angusipput, tallimanngorpallu Nuukullammi, Sanaartornermik Ilinniarfiup Nuummi immikkoortortaqarfiani, allagartartaartinneqassapput. Tamarmik sanasunngorput tamarmillu Nuummeersuullutik.
- Atcon-Emj-imi aalajangersimavugut lærlinginik amerlasuunik pikkorissunillu ilinniagaqartitsiniarluta, taamaasilluta piffissaq ungasinnerusoq isigalugu Kalaallit Nunaanni sulisunik ineriartortitsinermi peqataaniassagatta, suliniuteqarnermi pisortaq Gruno Krogh, Aton-EMJ-imeersoq, oqarpoq.
- Tamanna takuneqarsinnaavoq maanna qulinik lærlingeqaratta sanasunik, flisemontørinik konstruktørinillu. Ingerlatsivimmi ilinniagaqarfinnut, siusinnerusukkut maani Nuummi Sanaartornermik Ilinniarfimmut attuumassuteqarsimasunut, akisussaassuseqarpugut. Qaammatit tamaasa ingerlatsivimmi lærlingit tamaasa katersortarpavut oqaloqatigalugit, tamarmillu takkuttarput imminnullu tapersersoqatigiittarlutik. Ilaatigut tamanna pissutigalugu lærlingit ataqatigiilluartuupput. Inummik aalajangersimasumik saaffiginnittarfeqarput tamatigut aperisinnaasaminnik, Bruno Krogh nassuiaavoq.