Kammalaataalluarnerpaaq
Umiarsualivimmi terminalimi sulisoq Svend Heilmann, Royal Arctic Line Maniitsoq, ilinniagaqarfimmini ukiumi kammalaataalluarnerpaatut toqqarneqarpoq
Svend Heilmann tallimanngormat Saviminilerinermik Ilinniarfimmit umiarsualivimmi terminalimi sulisusut soraarummeerpoq. Soraarummeersut 37-it akornanni, inuiaqatigiinni sulilersussani ukiumi Kammalaataalluarnerpaatut toqqarneqarpoq.
Svend atuariartoraangami nuannaarpasillunilu qungujulasarpoq, tamannalu klassimi suleqatigiilluarnermut sunniuttarpoq. Ulluinnarni sullerissorujussuuvoq suliassanik sunilluunniit tunineqaraangami. Ikiortissaaleqigaanni oqarfigiinnariaasarpoq, orniguttarporlu pisuinnarani arpallunili, kinaluunniit ikioqqugaluarpat. Sammisaqarfimmini ingerlalluarnissaanik kissaapparput, Saviminilerinermik Ilinniarfimmit tunngavilersuut taama nipeqarpoq.
Svend Heilmann Nuummi Sulisitsisut Peqatigiiffiannit checkimik 1.250 koruuninik aningaasartalimmik tunineqarpoq, kammalaataalluarnerpaanera pissutigalugu.