Siriusermiut Sovjetunioniusimasup aqqartartuinik malersuisarsimapput
Soruunnerup nillertup nalaani sakkutuut nunarsuarmi avannarsaaniittut killeqarfimmik illersuiniaannarsimanngillat
Danskit sakkutuui Sirius Patruljen tunup avannaani Daneborgimi qullersaqarfeqartut sorsuunneq nillertup nalaani nunatta avannaarsuata killeqarfiinik alapernaarsuinerinnaq kisimi ingerlassimanngilaat. Suliarisarsimasaasami ilaat ulloq manna tikillugu isertuunneqarsimasoq aamma naammassiniartussaasimammassuk.
- Siriusermiut sikumut aqqariarlutik sovjetunionip aqqartartuinik tusarnaarutit atorlugit nakkutilliisarsimapput. Tassami tusarnaarutit atorlugit nakkutilliineq periarfissatuarisimavaat, taamaamallu Siriusikkormiut suliassaanut pingaarutilinnut taanna ilaasimalluni. Taamanimi sovjetunionip aqqartartuisa Kalaallit Nunaat angallaffigisimaqimmassuk, taama danskit nunanut allanut ministererisimasaat Uffe Ellemann Jensen TV 2-p nunani allanini pisut pillugit aallakaatitassiaani "Ellemann og Lykketoft"-ip aallakaatinneqarnerani oqaluttuarpoq. Aallakaatitassiami nunarsuarmi politikkikkut nunatta ullumi inissisimanera sammineqarsimavoq.