Danskeq peqqippallaanngilaq
Danskit milliuunit affaat niaqorluttarput, 900.000-t sinnarluttuullutik 100.000-illu kiakkeqqajaanermik nappaateqarajuttuullutik
Qaammatini kingullerni ´danskit nappaataat´-nik qulequtserneqarsimasunik tusagassiutit allatarisimasaat qimerluulaaraanni danskit 12 milliuuninik assigiinngitsunik nappaateqartarput, taama atuagassiaq metroXpress allaaserisaqarpoq.
Aalborgip Universitetiani tarnip pissusaa pillugu professoriusup Svend Brinkmannip naliliinera naapertorlugu danskerpassuit pisariaqavinngikkaluanik nappaateqarrattorsuupput.
- Kisitsisit katiteraanni ajortoqarpasippoq. Tassami inuit taama amerlatigisut nappaateqanngillat, Svend Brinkmann oqarpoq.
- Akunnitsinni nappaatissarsiorujuttut isorisariaqarsoraakka. Taakkuugajuttarpummi nakorsaatiliorfimmeersut kiisalu katsorsaasartut, tarnip pissusaanik ilisimasallit nakorsallu uagut napparsimanitsinnik iluanaaruteqartussaasut, Svend Brinkmann oqarpoq.
Svend Brinkmannip naliliinera malillugu inuit nikallungarujussuarnermik imaluunniit annilaanganermik nappaatillit katsorsartariaqanngikkaluarpulluunniit. Kjeld Møller Pedersen Syddansk Universitetimi peqqinnissaqarfimmi aningaasartuutinik ilisimasallip aamma kisitsisit taagorneqartut isorinnippalaartumik isigisariaqarsorai:
- Nappaatissarsiorujuttunut ilaanngikkaluarpunga, taama oqarpoq aammali ilisimatusarnermi katsorsaanermilu siuariarsimanerit danskeq ataaseq agguaqatigiisillugu marlunnik nappaateqalersersimanerannik allanik nassuiaatissaqartinnerarlugu. Svend Brinkmannilli pisariaqanngikkaluamik nappaateqarnerarluta iluanaarnianik tikkuartuussinera aamma ilumoortortaqarnerarpaa:
- Nakorsaasiorfissuit iluanaarniarnissartik soorunami soqutigisarisuuaat, aammali nakorsat pikkoriffigisaminnik nittarsaassiniartuartuunerat aamma nalunngilara. Isumaga malillugu nakorsaasiorfissuit pilertorpallaamik pisuutinniarneqarput, tassami napparsimmavimmi uninngasunut suut pitsaanerpaajunersut nakorsat ilaasa nittarsaanniapallattaraat nalunnginnakku, Kjeld Møller Pedersen taama nassuiaavoq.
Nakorsaasiorfissuit nappaateerarpassuanissimaneranik pisuutinniarneqarneri nakorsaasiorfissuit peqatigiiffiata eqqunngitsuunerarpaa:
- Ilami nakorsaatit uani eqqartorneqarput. Tassami inuit napparsimaleraangamik nakorsamukartarput. Ilisimasat aallaavigalugit nakorsaasiorneq tunuliaqutaraarput, soorlu nakorsiartarfinni ilikkarsimasagut ilisimatusarnermilu paasisimasavut aamma tunuliaqutarigivut atortarlutigillu, taama tusagassiinermi pisortaq Lars Bech Pedersen oqaluttuarpoq. Danskit peqqissusaat ukiut tamarluinnaasa Sundhedsstyrelsip nalunaarusiarisarpaa.
Statens Institut for Folkesundhed-imi Syddansk Universitetimiittumi ilisimatusartuuneq Knud Juel danskit peqqissusaanik ukiut tamaasa misissueqataasarpoq, taassumalu ineriartorneq pissusissamisuuginnarsoraa, tassami pinnguuaatinik pinngitsuuisinnaajunnaarsimasut (ludomani) kiisalu killeerullutik pisiniartartut (købemani) aamma nappaatinngorsimammata.
- Suugaluarapalluunniit soqutaanngilaq. Tassami nappaat nutaaq sunaluunniit ajoqutaalluinnarsinnaanngussappat, taava inuiaqatigiit soorunami qisuariartariaqassapput. Taama Knud Juel Naggasiivoq.
Aallerfigisaq: http://www.metroxpress.dk/nyheder/danskerne-er-virkelig-virkelig