Demokratit IA-kkormiut tupaallaatigaat

- Pinerluuteqartarneq imminut akilersinnaanngisaannartariaqaraluarpoq, Greenpeacermiulli pinerlunneq aqqutigalugu isummersorsimanerat politikerit naalakkersuisuutitaqartuneersut iiginnarsimavaat. Tamannalu akuerineqarsinnaanngilaq.

Taama Inatsisartuni ilaasortaq Demokratineersoq Andreas Uldum oqaaseqarpoq.

- Avatagiisinut illersuiniaqatigiiffik Greenpeace pinerlunnissartik oqaloqatigiinnermiit ajoraluartumik piumaneruaat. Arlaleriarlutimmi nunatsinni inatsisit piaaralutik unioqquttareersimammassuk. Ukiormi manna - maajip 29-ani - annanniut puttasuliamik taagorneqartoq Leiv Eirikssonimut illersuiniaqatigiiffimmeersut ikkummassuk unioqqutitseqqaarput.

- Juunip 4-ni illersuiniaqatigiiffimmiut 18-t Leiv Eirikssonimut qallormata aappassaanik unioqqutitsipput. Kalaallit soqutigisaanut pinerliinerit taamaattut tamavitta sakkortuumik assuarlertariaqaraluarpavut. Nunatsinnili partiit annersaaneersut suleriaasissaq alla qinersimavaat, taama Andreas Uldum erseqqissaavoq.

Naaja Nathanielsenip pisassani pissavaa

- Greenpeacermiut taamatut pinerluuteqareersullu IA-p ilaasortaa nuimasoq Naaja Nathanielsen juunip 7-ani - Greenpeacermiut aappassaanik pinerluuteqarneranniit ullut pingasut qaangiuttullu - uuliasiorneq pillugu apeqquteqaasiorsimavoq. Apeqqutaalumi qangali apeqqutigineqareersinnaasimagaluarput. Taamaattoqarsimaneralumi ataasiakullanneriinnaassasoq Demokratit neriuutigisimagaluarpaat.

- IA-kkormiulli nuimalluinartut marluk - tassa IA-p politikkianut siulittaasup tullia folketingimilu ilaasortaq Juliane Henningsen kiisalu IA-kkormiut inatsisartuni gruppeanni siulittaasup Olga P. Berthelsenip Naaja Nathanielsenip iliuusai juunip 8-ani illersornerarmatigik. Allaammi Juliane Henningsenip Greenpeacermiut nersualaarpai ima oqarluni: "Greenpeacermiut tamatumunnga tunngatillugu eqeersaanerat ajoriinnangassaasorinnginnakku."

- Tassa nunatsinni partiit annersaani ilaasortap nuimasup pinerluuteqarneq aqqutigalugu isummersorneq ajorsorinngilaa. Tamannalu tupaallannartupilussuuvoq, Andreas Uldumip tusagassiutinut nalunaarusiaani taamatut allassimasoqarpoq.

Naalakkersuisut aaliangiussimasaat oqallisigissallugit Demokratit ajoriffissaqartinngilaat.

- Pinerluuteqarsimanerilli tunuliaqutaralugit oqallinnissaq nuannarinngerluinnarparput, taama Andreas Uldum naqissusiivoq.