Isumannaallisaanermi killigititat sukateriffigisariaqarput
Greenpeacermiut iliuuseqaqqinnginerini uuliasiorluni qilleriffiit ungalullugit isumannaallisaanermi killigititarineqartartut sukateriffigineqartariaqartut Siumukkormiut isumaqarput
- Imaani uuliasiorluni qillerisoqartillugu isumannaallisaanermi kiligitinneqartartut sukateriffigineqarnissaanut naalakkersuisut pilersaaruteqarpat?
Taama inatsisartuni ilaasortaq Siumukkormiu Kristian Jeremiassen paragraf 37 malillugu apeqquteqarpoq.
Aamma Cairn Energyp uuliasiornera tapersersornerarlugu naqissuserpaa, oqarnerattuullu: "aningaasaqarniarnitsinnut suliffissaqartitsiniarnitsinnullu iluaqutaasussammat".
- Siorna uuliasiorluni qillerinerit Greenpeacermiut iluattitsillutik unitsippaat, aali isumannaallisaanermi killeqarfeqarfiit atuukkaluartut. Taamaammat Greenpeacermiut isaaqqissanngippata isumannaallisaanermi killeqarfigitittakkavut suli annertusaqqittariaqarsoraakka, Kristian Jeremiassen taama oqarpoq.
- Issittumi avatagiisitta innarlerneqariaannaanerinik Greepeacermiut oqariartuutaat isumaqatigisinnaalluarpara, Greenpeacermiulli iliuuserisimasaat illersorsinnaanagulu akuersaarsinnaanngilara, taamaattunimmi suliaqartoqartillugu nunat tamat maleruagassaat sukanganerpaat nunatsinni atuutsinneqarmata.