Canadamiut nunatsinni rubinisiorlutillu safirisiornialerput

True North Gems Inc. Canadami Vancouverimi qullersaqarfeqartut Qeqertarsuatsiaat eqqaani Aappaluttumi rubininik safirinuillu aappilasunik piiaaffiliornissaminnik Namminersorlutik Oqartussanut qinnuteqarsimanertik tusagassiutinut ullumi nalunaarutigaat.
Teknikkimut tunngasunik nalunaarusiaq, avatagiisinut sunniutaasinnaasunut nalunaarusiap pingaarnersiornera (EIA-mik naalisarneqartartoq) kiisalu inuiaqatigiinnut sunniutaasinnaasut pillugit nalunaarusiaq pingaarnersiornera (SIA-mik naalisarneqartartoq) inatsisit atuuttut malillugit qinnuteqarnerminnut ilanngusimanerarpaat.

Piiaaffissap aallarnersarnerani inuit 60-t sulisorineqarnissaat naatsersuutigineqarpoq, piiaaffissarlu ingerlallualerpat inuit 70-t 80-llu akornannniittut sulisorineqarnissaat aamma naatsersuutigineqarluni. Nuummi inuit 14-t piiaaffiliortitseqatigiit allaffeqarfeqassapput tassanilu ujaqqat pinnersaatissat nassaarineqarsimasut immikkoortiterneqartassallutik. Ineriartornissamullu pilersaarut malillugu ukiuni 9-ni piiaaffiup ingerlanissaa naatsersuutigineqarpoq. Aamma ujaqqanik kusassaatinik ujaaseqqinnissamut inerisaanissat ukiorpaalunni tullinnguuttuni pinissaa naatsersuutigineqarpoq.

- Sulisut amerlanersaat Kalaallit Nunaanneersuunissaat True North Gemsip pingaartippaa, piiaaffinnilu sulinissamut pikkorissaasarnerit nunaqarfimmiut iluaqutigiumaagaat ingerlanneqartarumaarput, taama pisortaq Nicolas Houghton unnersiorpoq, siunissamilu Kalaallit tamarmik tulluusimaarutigisinnaasaanik ujaqqanik pinnersaasiornermik suliaqalertoqarsinnaanera qilanaarinerarlugu.

Avatagiisinut sunniutaasinnaasunut, kiisalu inuiaqatigiinnut sunniutaasinnaasunut nalunaarusiat naalisarneqarneri kalaallisuumut qalunaatuumullu nutserneqariarlutik True North Gemsip nittartagaani saqqummersinneqarumaarpoq.

True North Gems Inc. TSX Venture Exchange-imut atavoq, tassalu nunatsinni, amerika avannarlermilu ujaqqanik pinnersaasiassanik ujaasinermik piaanermillu suliaqartuullutik. Suliffeqarfik ujaqqanik pinnersaasiassanik qalipaatilinnik piiaanermik suliaqaqqaartuuvoq Aappaluttumilu rubininik safirinillu piiaanissamut akuersissutit tamarmik pigisarisuullugit. Tamatuma saniatigut Yukonimi smaragd-inik piaanissamik akuersissuteqarput, beluga safirinillu Nunavummi piiaanissamut aamma akuersissuteqarlutik.
True North-illi nunatsinni Aappaluttumi rubininik piiaaffiliornissap siuarsarneqarnissaa massakkorpiaq ukkinnerpaagaa tusagassiutinut nalunaarusiaanni atuarneqarsinnaavoq.

Suliffeqarfik paasisaqarfiginerorusukkukku UNA tooruk.