Lars-Emil GME-p siulersuisuiniit tunuarpoq

Lars-Emil Johansenip politikkimiit tunuariartuaarniarnini aallarnerlugu Greenland Minerals A/S-ip siulersuisuini siulitaasuunerminit tunuarumanini nalunaarutigisimavaa.

Taarsiullugu nunatsinni suliffeqarfinnut siunnersuisunngorumavoq, sualummillu piiaaviit- uuliasiorfiillu sullikkumallugit, taamaammat arlaannaanulluunniit attuumassuteqannginnissi iluaqutaassanerarpaa. Taamaammat Lars-Emiili siunnersuisartutut namminersortutut inissinnikkumavoq, suliffeqarfiillu nunatsinniittut suliakkiussariumaagaat suugaluilluunniit aallukkumallugit, aamma soorunami GME A/S-p suliakkiukkumasai ilanngussinnaassallugit.

- GME A/S-imi siulersuisuni ukiuni marlunni kingullerni siulittaasuuninni suliarisarsimasakka nuannaarutigivakka, tassami nunatta kujataani suliffeqarfinnik piorsaanermi peqataasinnaasimagama. GME A/S-ip Kuannersuarni pisuussutit isumannaatsumik kusanartumillu atorluarnissaanik suliniutaat kusanarluinartuuvoq. Piiaanissamullu akuersissummik pissarsiniarneranni iluatsilluarnissaannik kissaappakka, suliffeqarfiullu uanga siunnersuisutut atorumappannga soorunami akuerissavakka, kisianni suliffeqarfiup ingerlataanut attuumassuteqassanngilanga.
Qanittumi ukiuni 40-ni politikkimik suliaqareerlunga Folketingimiit tunuarnissannut atatillugu suliffeqarfissuarni tamakkunani ikiuussinnaalernissara kissaatigisimavara. Taamaammat GME A/S-ikkut taamatut nalunaaruteqarfigissallugit pissusissamisoorsorisimavara, siulersuisuni siulittaasussamik sassartussamik naliginnaasumik qanittumi ataatsimeersualertinnagit periarfissikkumagakkit. Taama Lars-Emil Johansen naggasiivoq.