Filmiliortut ersartaanneqartut

Inuit assuataartut Katuami katersuummata filmi pissanganartuliaq "Qaqqat alanngui" isiginnaariarpaat. Filmillu aallartinngilaattaani Kommuneqarfik Sermersuumi borgmesteri Asii Chemnitz Narup isiginnaariat champagneamik iggiserneqarsimasut ima oqalugiarfigai:

- Oqaluttuartut nuannarisavissuaraagut. Amerlanerpaajusugummi oqalualaartut akornanni alliartornikuuvugut, ukiunilu kingullerni oqaluttuariaatsit nutaat aamma atugarineqalersimapput. Nuannaarutigeqisannillu kalaallit oqalualaanut nuannarinninnerat filmiliamut mutinngorlugu nuunneqarsimavoq.

- Illarnissarput nuannarisuuarput. Qiiaammisaartinneqarnissarpulli suli nuannarineruarput, aliortukkat, qivittut pisullu eqqumiitsut arajutsiniarneq ajortuuavut. Taamaammat "Qaqqat alanngui"-nik suliarinnittut inuunermut isiginnittariaasitoqarput kultoorerpullu mutiusumik taputartuussinerat assorsuaq nuannaarutigivara, taamalionerammi inuusuttuaqqanut saaffiginnittuummat, taama Asii Chemnitz Narup ilaatigut oqalugiarpoq.

Filmi qiiaammisaarnartoq

Filmeriat assuataartut kiisami isaalermata sakkussaaleqinngillat: Popkornit, mamakujuit imeruersaatillu taamannaannaq. Filmilumi nuannarineqaqaaq. Tassami filmip nal. ak. 2-ni sivisutigisup ingerlanerani qiiaammerpallattarnerit, nilliasarnerit illarpallattarnerillu tusarsaasimapput.

Naliliineq atuaruk:Naanissaata tungaanut pissanganaq.

Filmiliortoq Malik Kleist isiginnaartitsisarfimmut qaqimmat inuit nikuillutik ersaartaappaat. Inuillumi nuannarinnissimaqaat.

- Isiginnaartitsisartut filmiliaq piviusunngortippaat, taakkuuppummi filmimik piviusunngortitsipput. Siunissami filmiliortoqaqqinnialerpat inuit, suliffeqarfiit, aningaasaateqarfiillu kalaallit filmiliaanut suli annertunermik aningaasaleeqataarusunnerunissaat neriuutigaara. Tassami naak filmiliarput pitsaagaluaqisoq akissaqarnerusimasuugutta suli pikkunarnermik filmiliorsimasinnaagaluaratta, taama Malik Kleist filmi naareermat oqalugiarpoq.

Immikkut qaaqqusat filmertinneqareermata Kimmernaq aamma Nanook aliikkusersuipput.